BNG e PSdeG acusan a Rueda de "encubrir" a Alfonso Villares e critican que filtrara o nome de Paloma Lago

Nacionalistas e socialistas seguen sen entender porque o presidente da Xunta, Alfonso Rueda, tardou varios meses en pedir o cesamento do seu ex conselleiro do Mar, Alfonso Villares, tras saber, desde febreiro, que fora denunciado por agresión sexual. 

Así, aportavoz nacional do BNG, Ana Pontón esixiu a comparecencia no Parlamento do Presidente da Xunta, Alfonso Rueda, para “explicarlles ás mulleres deste País por que calou e encubriu un presunto agresor sexual durante meses”.  “Non contento co seu silencio cómplice, Rueda e o seu goberno pechou filas co presunto agresor, ao que despediron con todos os honores,  entre abrazos e aplausos, mentres ignoraban e desprezaban a vítima, cuestionando a veracidade da súa denuncia”, criticou.

Pontón manifestou na súa intervención ante os medios, durante o Consello Nacional,a súa solidariedade, respecto e apoio ás mulleres vítimas de violencia de xénero que non calan diante dunha agresión machista, moi especialmente á muller que denunciou o xa ex conselleiro, a ex presentadora Paloma Lago. “Sabemos que non é fácil, e menos cando a quen se denuncia é membro do Goberno e amigo persoal do Presidente”, indicou.

Neste sentido, o portavoz da Executiva do PSdeG, Julio Torrado, sinalou ao PPdeG como "responsable da filtración" do nome de Lago por parte do que ata o mércores foi conselleiro do Mar, Alfonso Villares, tras dimitir ao estar investigado. "Despois de cinco meses, o nome da denunciante cóntase aos medios apenas 15 minutos despois de que o conselleiro anunciase a súa dimisión. É un intento do PP, ao que sinalamos directamente como responsable da filtración do nome da victima, de que se poña o foco na persoa que denuncia", sinalou Xullo Torrado este sábado en rolda de prensa.

Neste sentido, os socialistas galegos alertaron de que este feito "pode ser mesmo" constitutivo de delito e é de "indignidade e de inmoralidade" pór o foco na denunciante. "Calquera persoa pode ler e informarse máis sobre a persoa denunciante que sobre a denunciada", subliñou.