COB, ata o último folgo

“A única opción enriba da mesa é que o Concello poña ese 21% do aval, xunto co outro 21% da Deputación, ter esa cantidade pechada e que algunha entidade bancaria, Abanca xa nos transmitiu que nese formato a operación non era viable, lle interese e queira participar neste proxecto”, sostén Antonio Gavilanes, presidente do COB.

Como estaba previsto, entre queixas de directivos e seareiros no salón de plenos, os tres grupos da oposición no Concello de Ourense -Democracia Ourensana, PSdeG e Ourense en Común- votaron en contra da proposta do PP de conceder una subvención de 1,5 millóns ao Club Ourense Baloncesto para completar o aval de tres millóns e inscribirse na liga ACB.

Deste xeito, o soño ourensán de estar na máxima categoría do básquet semella lonxano. A directiva cobista traballa de novo contra o reloxo e segue con reunións para atopar unha solución que cada vez semella máis imposible antes do día 15. Unha das posibles vías sería celebrar un pleno extraordinario a vindeira semana para que o Concello aporte ese 21% do aval (600.000 euros) co apoio de PP e PSdeG; e que a Deputación conceda outros 600.000 euros ou incluso manteña os 1,5 millóns xa aprobados; e negociar nunha semana con Abanca ou con outra entidade o aval de tres millóns para acceder á ACB.

No pleno do Concello, o concelleiro de Deportes, Mario Guede, defendeu a subvención polo “impacto directo” que tería o ascenso na economía da cidade. Pola contra, o voceiro de DO, Gonzalo Pérez Jácome, amosouse contrario a que se dé diñeiro público a espectáculos deportivos e culpou ao alcalde Xesús Vázquez de non presionar a Abanca para que ceda. O socialista José Ángel Vázquez Barquero mantivo que a aportación deber ser en función da porcentaxe do Concello no accionariado (21%, 607.000 euros). O voceiro de Ourense en Común, Martiño Vázquez, apuntou que o Concello non é accionista maioritario e instou aos demás accionistas, como Coren ou Copasa, a que poñan cartos se queren que o club estea na ACB.

Nun comunicado, o líder do PP ourensán e presidente da Deputación, Manuel Baltar, criticou “a miopía política” de PSOE, Democracia Ourensana e Ourense en Común por votar en contra e asegurou que debería darlles “vergoña” pronunciar a palabra Ourense, porque coa súa decisión “pisotean a ilusión da xente e impiden levar a cabo un proxecto que beneficia deportiva e económicamente á nosa provincia”. O líder popular, quen chamou “cutres da política” á oposición, criticou “a mediocridade e falta de altura política” e pediu “unidade” para un proxecto social e deportivo que leva o nome de Ourense “alá por onde vai”.

Cada vez máis resignado anda o presidente Antonio Gavilanes. “O optimismo é o último que debemos perder cando somos os principais implicados nesta guerra. Non imos baixar os brazos ata o día 15. Que dúbida cabe que todo isto son pedras no camiño que te van minguando”.