Altri reafirma a súa "solidez ambiental" logo que o Goberno anunciase que non concederá achegas do Estado

Altri reafirmou a súa "solidez ambiental", o seu "encaixe normativo" e a súa "dispoñibilidade" de diálogo coas institucións despois de que a vicepresidenta terceira e ministra para a Transición Ecolóxica, Sara Aagesen, nunha visita este mércores a Vigo, garantise que o proxecto da pasteira lusa en Palas de Rei "non vai contar con axudas por parte do Estado". "Entendemos que temos que sempre avogar por proxectos que teñan garantías ambientais", deixou claro.

Ante isto, nun comunicado, Greenfiber sinalou que o proxecto conta cunha Declaración de Impacto Ambiental favorable, emitida pola Xunta tras un "proceso exhaustivo e rigoroso", para o que elaboraron e analizaron "máis dunha trintena de informes sectoriais".

"Coa actual DIA favorable, Gama xa demostrou ser un proxecto tecnicamente conforme a unha normativa autonómica recoñecida polo seu alto nivel de esixencia, superior en moitos aspectos á normativa estatal e europea, o que implica que cumpre cos máis esixentes estándares ambientais vixentes a nivel mundial", asegura Greenfiber.

Así mesmo, en canto á resolución provisional do Perte de descarbonización a empresa asegurou que o proxecto "en ningún caso" contempla o uso de gas natural durante o primeiro ano, "como se interpretou erroneamente".

Nese sentido, detallou que o proceso "será 100% libre de combustibles fósiles" desde o inicio e as mencións ao gas natural "unicamente refírense a escenarios puntuais de arranque permitidos pola normativa".

Greenfiber tamén puntualiza que "non solicitou" axudas do Estado, senón o acceso a fondos europeos mediante o Plan de Recuperación, Transformación e Resiliencia (PRTR).

Como desde o primeiro momento, a compañía volveu facer referencia á súa "dispoñibilidade e vontade de diálogo" con distintas administracións.

O proxecto "continúa o seu curso" tras obter, en marzo, a DIA favorable por parte do Executivo autonómico e avanza agora na tramitación da Autorización Ambiental Integrada (AAI), requisito imprescindible para iniciar a fase construtiva.

Paralelamente, avanzou a compañía, traballan no peche dun modelo financeiro definitivo, que inclúe a identificación de novas fórmulas de financiamento público compatibles coas características do proxecto.

Proxecto de Altri en Palas de Rei | Fonte: Arquivo