A exconselleira Beatriz Mato deixa o consello de administración de Greenalia
Mato incorporouse en xuño de 2021 ao consello de administración da empresa coruñesa de enerxías renovables, aínda que xa fichara en 2020 como directora de Desenvolvemento Corporativo
Por E.P. | SANTIAGO DE COMPOSTELA | 26/06/2025 | Actualizada ás 19:25
A exconselleira da Xunta Beatriz Mato deixou o consello de administración de Greenalia, segundo informa o Boletín Oficial do Rexistro mercantil (Borme) deste xoves.
Mato incorporouse en xuño de 2021 ao consello de administración da empresa coruñesa de enerxías renovables, aínda que xa fichara en 2020 como directora de Desenvolvemento Corporativo.
Foi concelleira do PP no Concello da Coruña e conselleira durante a etapa de Alberto Núñez Feijóo como presidente da Xunta.
Durante case dez anos, de 2009 a 2018, foi conselleira da Xunta de Traballo e Benestar e Medio Ambiente e Ordenación do Territorio (2015-2018).
Os accionistas maioritarios de Greenalia son José María Castellano, presidente da compañía, e Manuel García, fundador e principal accionista. En 2022 finalizaron o proceso de OPA de exclusión do BME Growth.
A Xunta de Accionistas distribúese nun 94% para Smarttia (a sociedade de Manuel García) e o 6% controlado por José María Castellano (Alazady).
Noutro anuncio do Borme do pasado 15 de xuño, Greenalia comunicaba, ademais dos postos de José María Castellano e Manuel García no consello de administración, o cargo de Antonio Fernández-Montells como conselleiro executivo.
Mentres, Economía Dixital Galicia avanza este xoves a saída do presidente da Cámara de Comercio da Coruña, Antonio Couceiro, do consello de administración de Greenalia, exconselleiro con Manuel Fraga e expresidente do Deportivo.
