Sumar propón eliminar delitos de inxurias ao Rei, ultraxe á bandeira e ofensas relixiosas

O grupo parlamentario Sumar presentou unha emenda á lei de acceso á carreira xudicial e fiscal, actualmente en tramitación urxente no Congreso dos Deputados, co obxectivo de eliminar varios artigos do Código Penal que considera contrarios á liberdade de expresión. A proposta céntrase en suprimir os coñecidos como delitos de opinión, como as inxurias á Coroa, as ofensas a símbolos nacionais ou as ofensas a sentimentos relixiosos.

Esta manobra chega tras meses de parálise da proposición de lei que a propia Sumar levara ao Pleno en 2023 co mesmo fin, aprobada para a súa tramitación pero freada na fase de emendas. Ante esa situación, o grupo decidiu agora empregar como vía alternativa unha disposición adicional dentro da reforma da carreira xudicial que impulsa o Ministerio de Presidencia e Xustiza, dirixido por Félix Bolaños.

En concreto, Sumar propón suprimir seis artigos e modificar outros tres do Código Penal. Entre eles, o artigo 490.3, que penaliza as calumnias ou inxurias ao rei e á súa familia con ata dous anos de prisión, así como os que sancionan críticas a membros do Goberno, do poder xudicial ou do exército. Tamén busca eliminar o delito de ultraxe á bandeira ou aos símbolos nacionais e autonómicos, que actualmente contempla penas de multa de ata doce meses.

Outra das modificacións relevantes incluídas na emenda é a supresión do artigo 578, que castiga o enaltecemento do terrorismo e os actos que supoñan humillación ás vítimas ou aos seus familiares, con penas de ata tres anos de cárcere. A formación sostén que a redacción actual do artigo "ten un difícil encaixe nun sistema democrático".

Xunto a estas medidas, Sumar propón incorporar o racismo como agravante penal, prohibir a identificación policial motivada por razóns ideolóxicas e inhabilitar cargos públicos que impidan o exercicio da liberdade de expresión.

No Congreso, ERC tamén presentou unha emenda á mesma lei para suprimir o artigo sobre as inxurias á Coroa, mentres que o PSOE mantén rexistrada unha proposición de lei —pendente aínda de debate plenario— para eliminar as sancións por ofensas relixiosas, despois da polémica denuncia contra a presentadora coñecida como Lalachus por un comentario humorístico na pasada Noitevella.

A incorporación destas modificacións á lei orgánica en tramitación dependerá agora dos apoios que Sumar logre entre os grupos parlamentarios. A súa estratexia, que busca introducir os cambios a través dunha norma con carácter urxente, podería acelerar unha reforma lexislativa que leva meses bloqueada malia o consenso parcial existente en varias forzas do bloque progresista.