Desarticulan un grupo de delincuentes adicado a estafar anciáns, cun detido e varios investigados na provincia de Pontevedra

Unha investigación dirixida por un xulgado de Vigo e levada a cabo polo Grupo de Patrimonio da Policía Xudicial da Garda Civil de Pontevedra levou á desarticulación dun grupo dedicado a estafar a persoas de idade avanzada, e concluíu coa detención dunha persoa e a investigación de media ducia máis, entre elas, un procurador colexiado en Pontevedra. Segundo informaron fontes da Comandancia, as pescudas da chamada Operación Colddoor iniciáronse en febreiro pasado, ao entrar unha denuncia no xulgado de instrución 4 de Vigo, dunha persoa maior residente en Baiona. Esta persoa denunciou varios supostos delitos de estafa e falsidade documental en trámites de financiamentos irregulares.

A partir dese momento, a Garda Civil centrou a investigación nunha sociedade mercantil responsable de contratar vendas de diversos produtos a domicilio, con sede na Rioxa e delegación no Porriño. Tratábase dunha sociedade que "xa posuía declarada insolvencia definitiva por un Xulgado do Social de Vigo". Ao analizar os contratos de vendas (de produtos como masaxeadores de pés ou de xeonllos, purificadores de auga ou aire, fundas de colchóns, etc.), os investigadores identificaron as persoas responsables da administración, das visitas aos domicilios e das vendas mediante enganos.

VENDAS A DOMICILIO

Primeiro seleccionaban os domicilios que ían visitar, preferiblemente de xente maior que vivía soa, e ofrecíanlles diversos agasallos como 'gancho' para gañarse a súa confianza e venderlles os produtos. Os vendedores recibían cursos e xornadas preparatorias para levar a cabo esas vendas, e tiñan aprendido un guión para convencer aos anciáns. Na primeira visita asinaban un precontrato de venda dun produto supostamente terapéutico cuxo prezo roldaba os 3.500 euros, un prezo moi por enriba do seu valor real, e ofrecíanse sistemas de financiamento mediante pago de mensualidades.

Ao día seguinte, persoal da empresa levaba os produtos e eran os encargados de asinar o contrato de venda e o de financiamento. Non entanto, se había posibilidade de cobrar en efectivo, realizaban os cobros sen que queda constancia diso no contrato de venda nin no de financiamento. Mesmo en ocasións, informou a Garda Civil, este persoal ofrecíase a acompañar aos clientes ao banco para retirar diñeiro das súas contas.

VARIAS IRREGULARIDADES

A investigación permitiu constatar, a través da facturación presentada ante Facenda, que os produtos ofrecidos facturábanse como agasallos, sendo o maior montante enciclopedias ou coleccións de libros descatalogados, e que unicamente tributaban un 4 % do IVE. Outra forma de enganar aos afectados consistía en refinanciar as súas compras, convencendo ás persoas maiores de que terían mellores condicións de pago e prazos. Con todo, en realidade pechaban un novo financiamento con outra empresa, de maneira que os afectados tiñan máis 'letras' mensuais para pagar distintos préstamos persoais. No marco desta investigación, solicitouse ao responsable da Delegación do Servizo de Consumo de Pontevedra, que realizase estudo dos contratos de venda da empresa e do financiamento. No seu informe, este experto describiu numerosas infraccións á Lei para a defensa dos consumidores e usuarios; á Lei de venda a prazos de Bens mobles; e á Lei de contratos de crédito ao consumo.

Estas infraccións consistían, entre outras irregularidades, en: carencia ao detalle dos produtos obxecto de contratación e do prezo en man; carencia do cadro de amortización que debe entregarse ao consumidor no momento da contratación do préstamo; a información, sobre publicidade e promoción comercial de produtos, con pretendida finalidade sanitaria; constar menor prazo do exercicio do dereito de desistimento e de garantías; cláusulas abusivas no contrato por comisión de xestión de reclamación por falta de pagamentos; ou tratamento dos datos persoais sen autorización para a cesión. Neste escenario, os investigadores consideraron acreditados os delitos de estafa con agravante de abuso de confianza e falsidade documental en documentos privados.

INVESTIGADOS E DETIDO

Por iso, procedeuse á investigación dunha muller de 27 anos, veciña de Vigo e con antecedentes penais; un home de 28 anos, veciño de Redondela; un veciño de Ponteareas de 40 anos e con antecedentes; e un veciño de Valladolid de 49 anos e numerosos antecedentes penais. Igualmente, a principios de xuño notificouse como investigados aos responsables das sociedades financeiras implicadas, con sedes en Asturias e Cataluña: un home de 58 anos e veciño de Oviedo, e un home de 76 anos, membro do Colexio de Procuradores de Pontevedra.

Neste sentido, a Garda Civil sinalou que consideran que estas sociedades eran un medio para a comisión dos delitos porque, entre outras irregularidades, non facían constar nos documentos contractuais os produtos adquiridos, nin os prezos reais e non figuraba o custo da real do financiamento. Igualmente, os contratos carecían do cadro de amortización no momento da contratación e do preceptivo informe de solvencia. As pescudas saldáronse o pasado 17 de xuño coa detención, no aparcadoiro dun domicilio non habitual do Porriño, dun home de 45 anos de idade, veciño de Logroño, administrador da empresa e considerado 'xefa' do grupo.

No momento da detención deste home, que tamén ten antedecentes penais polos mesmos delitos que se investigan neste procedemento, intervéuselle un vehículo de alta gama a nome da sociedade, 1.500 euros en efectivo, un computador portátil, un disco de memoria e diversa documentación. A investigación está dirixida polo xulgado de instrución 4 de Vigo, coa participación do Fiscal especializado en Consumo da Fiscalía de Pontevedra.

Varios Axentes da Policía Nacional | Fonte: Rober Solsona - Arquivo