A renda na agricultura en Galicia sofre un estancamento fronte á subida en España
Trátase do traballo 'A economía galega. Informe 2024', unha publicación elaborada polo Instituto de Estudos e Desenvolvemento de Galicia (IDEGA), dependente da Universidade de Santiago de Compostela e que conta co apoio da Deputación coruñesa
Por E.P. | SANTIAGO DE COMPOSTELA | 03/07/2025 | Actualizada ás 19:38
Un estudo elaborado pola Universidade de Santiago de Compostela (USC) apunta ao estancamento da renda na agricultura en Galicia fronte á subida tanto en España como en Europa mentres que na pesca enumera problemas como a caída da descarga en lonxa ou o descenso da demanda.
Trátase do traballo 'A economía galega. Informe 2024', unha publicación elaborada polo Instituto de Estudos e Desenvolvemento de Galicia (IDEGA), dependente da Universidade de Santiago de Compostela e que conta co apoio da Deputación coruñesa.
Na presentación, participaron o presidente da institución provincial, Valentín González Formoso, e os profesores da USC Dolores Riveiro García e Roberto Bande Ramudo, coordinadores do traballo.
Do mesmo, indicaron que o traballo analiza o incremento da ocupación na industria (nun 9%) e a baixada do sector servizos; a subida das exportacións, coa automoción e o téxtil á cabeza ou o alto prezo dos alugueres, que aumentaron un 7,9 nalgunhas zonas urbanas.
Sobre a evolución do mercado de traballo, remarcaron que foi "bo" aínda que apostilaron que o ritmo de crecemento do emprego está "a retardarse" o que consideraron preocupante. Así, dixeron que mentres a economía española xa recuperou os niveis de ocupación previos a 2008 a galega "non foi capaz aínda".
Mentres, o presidente provincial incididó en cuestións como a repercusión dos aranceis de Estados Unidos ou a necesidade de incentivar a cualificación en sectores que demandan profesionais. Tamén aludiu á dinamización económica como un dos alicerces das políticas progresistas. "Dela depende o sostemento dos servizos públicos", aseverou.
