Encontro multidisciplinar aposta por outro modelo territorial para Galicia
300 profesionais alertan do impacto de proxectos industriais e anuncian novas mobilizacións para influír na planificación futura.
Por Europa Press / Redacción | Santiago de Compostela | 09/07/2025 | Actualizada ás 14:37
Uns 300 profesionais de distintas disciplinas participaron este sábado en Leboreiro (Melide) nun encontro pola defensa do territorio galego, marcado pola presentación dun manifesto asinado por 320 persoas. A iniciativa, organizada por arquitectos, xeógrafos, urbanistas e outros expertos, incluíu unha camiñada de 3,5 quilómetros desde Palas de Rei ata o punto escollido, situado a só 1,5 quilómetros do lugar onde se proxecta a instalación dunha empresa privada, en alusión implícita ao proxecto de Altri.
A arquitecta Alba López denunciou que determinadas actuacións, mesmo avaladas por administracións públicas, poderían “esnaquizar o territorio”, mentres que o arquitecto Xosé Allegue subliñou que “o territorio galego está a sufrir agresións e é necesario defendelo”.
Durante a xornada, veciños tomaron a palabra para expresar a súa preocupación e reclamaron un compromiso político co territorio que vaia máis alá dos intereses partidarios. A arquitecta Alba López reivindicou que “o urbanismo e as ciencias serven para mellorar a vida das persoas” e pediu que “a administración repense o que vai facer”.
A xeógrafa da USC María Xosé Piñeira incidiu na necesidade dunha planificación territorial con visión integral e cohesionada, e advertiu de que este encontro é só o primeiro dunha serie de accións que pretenden influír na toma de decisións institucionais sobre o futuro do territorio galego.
