O BNG denuncia en Europa o "boicot" á comparecencia de colectivos en contra de Altri

A eurodeputada do BNG, Ana Miranda, denunciou ante a Defensora do Pobo Europeo, Teresa Anjinho, o "continuo boicot" na Comisión de Peticións da Eurocámara para impedir que se trate a denuncia da plataforma Ulloa Viva contra a fábrica que a multinacional lusa Altri quere instalar en Palas de Rei.

Ademais, tamén denunciou as "dificultades impostas" pola Comisión Europea para o acceso a documentación sobre temas que "afecten directamente as galegas e galegos".

"Esa denuncia está a ser boicoteada sistematicamente polo grupo do PP e polos grupos de extrema dereita", criticou Miranda, que considerou que este "boicot" vulnera o dereito de acceso ás peticións e ás denuncias da cidadanía.

Así mesmo, segundo trasladou o BNG nunha nota de prensa, a eurodeputada galega tamén comunicou a Anjinho que a Comisión Europea "está a impedir o acceso á documentación relacionada con procedementos de infracción abertos pola ampliación da concesión da AP-9, Ence e outros proxectos estratéxicos como a mina de Doade", tal e como, apuntou, "ocorreu antes co accidente do Alvia".

"Queremos saber as causas deses procedementos de infracción e non nos permiten o acceso aos documentos", censurou a eurodeputada do Bloque.

A eurodeputada do BNG, Ana Miranda, coa Defensora do Pobo Europeo, Teresa Anjinho.. BNG | Fonte: Europa Press