18 de Xullo

O 18 de xullo de 1936 conmemórase un novo aniversario do golpe de Estado perpetrado por Francisco Franco, co apoio directo da xerarquía da Igrexa Católica e do empresariado.

Por Lois Pérez Leira | Vigo | 18/07/2025

Algúns historiadores, e tamén de forma popular, denominárono “Guerra Civil”. Porén, esta é unha denominación inexacta. O bando fascista contou co apoio maioritario das Forzas Armadas e coa colaboración activa da Alemaña nazi e da Italia fascista.

Sería máis axeitado denominala Guerra Antifascista, pois foi, na súa esencia, unha loita entre o avance do fascismo internacional e a defensa dun proxecto democrático representado pola Segunda República. A Guerra Antifascista foi o levantamento heroico dos pobos do Estado español fronte á imposición dunha ditadura militar, clerical e oligárquica. Foi unha loita pola liberdade, a xustiza social e os dereitos das clases populares.

No caso de Galicia, a partir do 20 de xullo de 1936, perpetrouse un auténtico xenocidio. Milleiros de membros do Frente Popular —alcaldes, deputados, sindicalistas, mulleres, anciáns e mesmo nenos— foron asasinados tras falsos xuízos e sen ningunha garantía legal. A día de hoxe, aínda existen persoas desaparecidas e soterradas en gabias e fosas comúns.

A pesar do tempo transcorrido, os delitos de lesa humanidade cometidos durante a ditadura franquista deben seguir sendo investigados. A memoria non prescribe. A Guerra Antifascista foi un exemplo de resistencia digna en defensa da Segunda República e dos valores democráticos.

Naceu en Vigo en 1953, emigrando á Arxentina cos seus pais sendo aínda un neno. En 1990 retorno definitivamente a Galicia, especializándose en temas migratorios. Durante estes últimos anos escribiu numerosos libros sobre a emigración galega e impartiu distintas conferencias en distintos países do mundo. Nos últimos anos se dedicou ao documentalismo sendo director de 18 documentais. Na actualidade é o secretario xeral de Nova Esquerda Socialista, organización que participa do Novo Proyecto Común. Foi distinguido en numerososa oportunidades, sendo nomeado cidadán ilustre da cidade de Salvador de Bahia.