O persoal sanitario galego mobilízase contra a “lei incompleta” de Sanidade

Traballadores do Sistema Nacional de Saúde (SNS) concentráronse este luns diante dos centros sanitarios galegos para reclamar ao Ministerio de Sanidade que non peche de maneira unilateral a negociación da lei que regula as súas condicións laborais. Os profesionais, convocados polos principais sindicatos do sector (SATSE -FSES, FSS-CCOO, UXT, CSIF e CIG-Saúde), demandan un estatuto que permita avanzar en dereitos e repercuta tamén nun mellor servizo para os pacientes.

As organizacións sindicais denunciaron que o proxecto elaborado polo Ministerio de Sanidade é unha lei “incompleta, parcial e interesada” que non dá resposta ás necesidades do conxunto do persoal estatutario. Critican ademais que o departamento dirixido por Mónica García rompeu o calendario de reunións previamente pactado e agora pretende levar o texto ao Congreso “pola porta de atrás” e con fins de oportunidade política.

Entre as melloras que reclaman, destacan o recoñecemento retributivo acorde ao novo modelo de clasificación profesional, a posibilidade de acceder á xubilación voluntaria —anticipada ou parcial—, a implantación da xornada laboral de 35 horas en todas as comunidades e o recoñecemento do solape de xornada. Lembran que estes cambios poden recollerse na norma e aplicarse posteriormente co apoio doutros ministerios e modificacións lexislativas necesarias.

As mobilizacións celebradas en toda España, excepto en Murcia —que se sumará o 17 de setembro—, marcan o inicio dunha nova fase de protestas. Os sindicatos advirten que continuarán coa presión e anuncian unha nova concentración o 1 de outubro fronte á sede do Ministerio de Sanidade, reiterando a súa disposición a seguir negociando para conseguir unha “lei á altura” que garanta unha sanidade pública de calidade.

GÓMEZ CAAMAÑO 

O conselleiro de Sanidade, Antonio Gómez Caamaño, mostrou o seu respecto a todas as concentracións de profesionais sanitarios -- en referencia ás concentracións sanitarias pola o novo estatuto marco --, pero si apuntou que o tema do estatuto é "un melón que abriu o Ministerio de Sanidade, que é quen o ten que pechar".

Así se expresou o responsable autonómico en declaracións aos medios tras participar na presentación da campaña universitaria de doazón para este curso.

Segundo apuntou, a Consellería xa deu a súa opinión sobre o estatuto. "Un estatuto que non ten memoria técnica, que non ten memoria económica e que invade competencias, é un estatuto discutible", sinalou.

Respecto da posibilidade dunha negociación propia para os médicos galegos, o conselleiro sinalou que o seu departamento "sempre está aberto a todo o mundo". "Temos que ver cales son as súas reivindicacións e ver como podemos abordalas", indicou, aínda que matizou que a existencia dun convenio específico "é un tema máis xurídico que político".