O PP denega inciativas para ampliar as axudas aos afectados por incendios en Ourense
Os populares argumentan que estas peticións da oposición "chegan tarde ou son innecesarias"
Por Europa Press / Redacción | SANTIAGO DE COMPOSTELA | 26/09/2025 | Actualizada ás 15:09
O PPdeG denegou, na Comisión de Agricultura, senllas propostas de BNG e PSdeG que piden, entre outras cuestións, unha ampliación das axudas para afectados por incendios e un plan extraordinario de prevención e recuperación na provincia de Ourense.
Na mesma semana na que o PPdeG tombou no Parlamento unha comisión de investigación sobre a vaga de incendios deste verán con máis de 100.000 hectáreas arrasadas, os populares volveron a refugar iniciativas da oposición relativas a estes lumes.
Por unha banda, o texto do Bloque solicitaba modificar a orde de axudas aos afectados pola vaga de lumes para ampliar o prazo de solicitude, eliminar a "excesiva" burocracia e contemplar o lucro cesante para todas as explotacións. Tamén pide que non haxa topes por perdas de producións e granxas, ademais de maiores apoios orzamentarios. Todo iso foi rexeitado polo PPdeG.
O deputado do BNG Secundino Fernández (BNG) cargou contra a "desidia de proporcións nunca vistas" da Xunta ante a catástrofe dos lumes, que agora carrexa un "grave problema de supervivencia" para o sector agrogandeiro e forestal.
Reprocha que o período de solicitude de axudas termina o vindeiro luns, o que, por exemplo, "restrinxe o prazo" aos afectados polo recente incendio de Pantón. Tamén critica unha "excesiva burocracia" para conseguir eses apoios, que tacha de "insuficientes e de face á galería".
En cambio, Miguel Ángel Viso defendeu que a liña de axudas é "seria, eficaz e xusta", polo que "atende ás necesidades reais". Asegura que "ninguén vai quedar sen axudas por falta de fondos".
O popular opina que estas peticións "chegan tarde ou son innecesarias", xa que a Xunta "non estivo de brazos cruzados" e aprobou unha orde de apoios para que "ningún quede atrás".
MEDIO RURAL "FALLOU EN OURENSE"
Mentres, a deputada socialista Carmen García Dacosta (PSdeG) alertou de que a Ourense leva anos sendo "o epicentro" dos lumes en Galicia. Apunta a que rexistrou 6.618 incendios entre 2015 e 2024, ao que se suma a actual vaga de incendios na que se estima máis de 100.000 hectáreas, aínda que non hai datos oficiais de afectación na provincia.
A deputada socialista considera que a cidadanía de Ourense e Galicia "merece respostas", "non a improvisación e a desidia" do Goberno galego. "Urxe pór sobre a mesa traballos de prevención", avisa, pois critica que quedan sen executar 11 millóns para prevención este ano, "e de aí derivan as funestas consecuencias" deste ano.
Advirte de que a Consellería do Medio Rural "fallou en Ourense", polo que esixe identificar "cales foron os erros que están detrás da resposta atropelada e superada desde o inicio" da Xunta.
A proposición non de lei dos socialistas denegada demandaba un plan extraordinario de recuperación e prevención en Ourense con reforzo de medios, así como deseñar antes da campaña de 2026 unha estratexia de mellora da capacidade operativa dos distritos forestais e a súa coordinación.
Tamén empraza a presentar un informe sobre os medios e persoal que estaba dispoñible nos distritos a 1 de xullo de 2025, así como remitir á Cámara unha relación dos traballos de prevención previstos para este ano.
Pola súa banda, o deputado de Democracia Ourensana, Armando Ojea, denunciou nesta comisión que o sistema de coordinación da Xunta "non funcionou" nos incendios en Ourense e critica que os populares rexeitasen esta semana unha comisión de investigación, a cal "sería importantísima".
