O novo plan de transporte do Barbanza mellorará conexións e frecuencias con Santiago
O orzamento total supera os 15 millóns polos cinco anos polos que se establece a duración da concesión.
Por Europa Press / Redacción | SANTIAGO DE COMPOSTELA | 01/10/2025 | Actualizada ás 16:02
O Diario Oficial de Galicia (DOG) anuncia este mércores o inicio de sometemento a información pública do proxecto de explotación do servizo público de transporte regular de viaxeiros por estrada da comarca do Barbanza. A documentación estará a disposición da cidadanía na web da Consellería de Presidencia, Xustiza e Deportes. A partir deste xoves ábrese un prazo de 10 días hábiles para que os interesados poidan formular por escrito as alegacións oportunas ao redeseño da Xunta dos servizos.
Entre outras cuestións, a Xunta destaca nun comunicado de prensa que o proxecto contempla un incremento do investimento ata os 3 millóns de euros anuais. Así, o orzamento total supera os 15 millóns polos cinco anos polos que se establece a duración da concesión. Contará con 48 vehículos, cinco máis que os actuais, e a maioría dos autobuses terán máis de 55 prazas, cun total de 28 destes vehículos.
Unha vez recalculados os itinerarios, circulacións e expedicións, a cifra de vehículos-quilómetros efectivos de produción supera os 3 millóns, resalta a Xunta. No que se refire a a reestruturación dos servizos con Santiago, entre outras novidades, prestarase unha nova liña directa por autoestrada entre Ribeira e a cidade con 30 servizos ao día con frecuencias cada hora e nas fins de semana e festivos haberá 18 servizos con frecuencias de ata dúas horas.
