Un total de 7,2 millóns de euros para avanzar na renovación dos edificios da USC e da UVigo: da facultade de Farmacia á ETEA

O conselleiro de Presidencia, Xustiza e Deportes, Diego Calvo, anunciou este luns que o Consello da Xunta acordou este luns destinar 7,2 millóns de euros ás universidades de Santiago de Compostela e Vigo para avanzar na renovación e na modernización dos seus edificios ao amparo do Plan de infraestruturas universitarias aprobado no 2023. Tal e como explicou Calvo, o Plan está dotado de 40 millóns de euros e prevé mobilizar "100 millóns ata 2026". Ademais, este novo investimento súmase ao Plan galego de financiamento universitario 2022-2026. E engádese tamén ao convenio asinado en 2021, por importe de 4,5 millóns de euros, para "mellorar a eficiencia enerxética" das infraestruturas universitarias, como anticipo a este Plan de infraestruturas.

En concreto, o obxectivo desta nova liña de actuación é "seguir avanzando na consolidación da excelencia e calidade do Sistema Universitario de Galicia". No caso da Universidade de Santiago, o conselleiro destacou que a Xunta realizará unha achega de "case 4,1 millóns de euros este ano que irán en exclusiva para a construción dunha nova facultade de Farmacia". Situarase dentro da nova Cidade da Saúde da USC, un conxunto de edificios que acollerá tanto esta facultade como a de Enfermaría, un centro de investigación na área de Ciencias da Saúde e un aparcadoiro.

Pola súa banda, Calvo explicou que a Universidade de Vigo destinará a achega deste ano, de máis de 3,1 millóns de euros, a dous proxectos: avanzar na construción da Escola de Enxeñaría Aeronáutica e do Espazo, no Campus de Ourense, e á rehabilitación do edificio Siemens na ETEA de Vigo. No caso da Universidade da Coruña, a Xunta indicou nunha nota de prensa que os 2,81 millóns de euros do convenio de 2023 foron autorizados excepcionalmente para gastos correntes por petición da propia institución. Mentres que a partida de 2024, polo mesmo importe, non foi executada por parte da UDC e está pendente de resolución, con todo, respecto ao convenio de 2025, aínda non comezou a súa tramitación.

NOVOS ESTATUTOS DA UDC

Doutra banda, o Consello da Xunta aprobou este luns o decreto polo que a Universidade da Coruña (UDC) reforma os seus estatutos, tras ser remitidos á Consellería de Educación, Ciencia, Universidades e FP e pasar o control de legalidade da Asesoría Xurídica Xeral da Xunta. Desta forma, cúmprese co trámite necesario para a publicación no Diario Oficial de Galicia do novo articulado, que foi aprobado en sesión extraordinaria polo Claustro Universitario o pasado 12 de maio de 2025. As novas normas entrarán en vigor o día seguinte ao da súa publicación no Diario Oficial de Galicia.

Noutra orde de asuntos, o Consello autorizou tamén a firma dun convenio de colaboración entre a Consellería de Política Social e Igualdade e a Universidade de Santiago de Compostela (USC) para financiar a gratuidade da atención educativa para todos os nenos da escola infantil Breogán no curso 2025-2026. Trátase do quinto ano que se asina este acordo con este centro que xestiona directamente a USC e a contía de leste é de case 240.000 euros, tal e como explicou o Goberno galego nunha nota de prensa.

LIMPEZA DE 34 CENTROS PÚBLICOS INTEGRADOS

A maiores, a Xunta transferirá 695.296 euros á Federación Galega de Municipios e Provincias (FEGAMP), un 5,5 % máis que o ano pasado, para cubrir os gastos de limpeza de 34 centros públicos integrados (CPI) situados en concellos de toda Galicia. O obxectivo é "reforzar a cooperación entre institucións e garantir unha prestación eficaz e sustentable dos servizos públicos, evitando duplicidades e favorecendo un uso responsable dos recursos".

Na provincia da Coruña son 12 os centros educativo: o CPI Cruz de Sar (Bergondo), Antonio Orza Couto (Boqueixón), Vicente Otero Valcárcel (Carral), O Cruzamento (Cerceda), Eusebio Lorenzo Baleirón (Dodro), A Xunqueira (Fene), da Picota (Mazaricos), de Xanceda (Mesía), Virxe da Cela (Monfero), dos Dices (Rois), de Bembibre (Val do Dubra) e de Vedra (Vedra). Os oito centros de Lugo son o CPI Luís Díaz Moreno (Baralla), de Castroverde (Castroverde), de Cervantes (Cervantes), Virxe do Monte (Cospeito), de Seoane (Folgoso do Courel), Tino Grandío (Guntín), Uxío Novoneyra (Pedrafita do Cebreiro) e San Tomé de Carballo (Taboada).

En Ourense son sete, entre os que está o CPI Tomás Terrón Mendaña (Carballeda de Valdeorras), Virxe dos Remedios (Castro Caldelas), Antonio Failde (Coles), Laureano Prieto (A Gudiña), de Maside (Maside), de Padrenda-Crespos (Padrenda) e Virxe da Saleta (San Cristovo de Cea). Por último, en Pontevedra son tamén sete, o CPI da Cañiza (A Cañiza), Curros Enríquez (Pazos de Borbén), de Pontecesures (Pontecesures), Domingo Fontán (Portas), Julia Becerra Malvar (Ribadumia), Manuel Suárez Marquier (O Rosal) e do Toural (Vilaboa).