A xustiza anula o ERTE da empresa Guidoni Quartz de Narón e ordena a restitución inmediata dos contratos
Un xulgado do social de Ferrol estima que a empresa non acreditou as causas organizativas e produtivas alegadas.
Por Europa Press / Redacción | FERROL | 06/10/2025 | Actualizada ás 17:45
O Xulgado do Social número 1 de Ferrol declarou nulo o expediente de regulación temporal de emprego (ERTE) aplicado pola empresa Guidoni Quartz Spain na súa fábrica do polígono das Lagoas, en Narón, ao considerar que as causas alegadas pola dirección non estaban debidamente acreditadas. A sentenza xudicial, que dá a razón ás denuncias presentadas polo sindicato CIG, obriga á inmediata restitución dos contratos de traballo suspendidos. O ERTE, que se iniciou o pasado 20 de xuño cunha duración máxima de seis meses, afecta de maneira rotativa a todo o persoal, mantendo actualmente a preto dun terzo dos traballadores en situación de suspensión de contrato.
Durante todo o proceso de negociación da empresa dedicada á fabricación de taboleiros de aglomerado de pedra, a CIG denunciou a insuficiencia da documentación e a falta de concreción por parte da empresa. O secretario comarcal da Federación de Construción e Madeira da CIG en Ferrol, Marcos Sánchez, sinalou que a dirección "non presentou toda a documentación establecida na normativa" e que a información entregada foi "totalmente insuficiente". Sánchez subliña que, a pesar das reiteradas solicitudes, a empresa non acreditou de forma clara e concreta as causas organizativas e produtivas, e tampouco especificou o número exacto de persoas afectadas, a súa clasificación profesional ou os criterios de selección.
REGRESO DOS TRABALLADORES AOS SEUS POSTOS
A sentenza obriga á empresa a restaurar de forma inmediata os contratos suspendidos e ao pago dos salarios deixados de percibir polos afectados, ou o abono das diferenzas respecto das prestacións por desemprego que puidesen estar a cobrar. O sindicato avanza que, aínda que o fallo pode ser recorrido ante o Tribunal Superior de Xustiza de Galicia (TSXG), estarán "vixiantes aos movementos da empresa e actuaremos en consecuencia". A CIG insiste na necesidade de implementar un plan de viabilidade e investimentos que garanta a continuidade da actividade produtiva e dos 122 empregos da planta de Narón.
