Miranda censura á UE por non defender a flotilla: "Dános vergoña"
Esixe romper relacións con Israel.
Por Europa Press / Redacción | SANTIAGO DE COMPOSTELA | 07/10/2025 | Actualizada ás 19:00
A eurodeputada do BNG, Ana Miranda, durante un debate na Eurocámara sobre o papel da Unión Europea (UE) nos esforzos de paz en Gaza, afirmou que a "inacción" da comunidade ao defender a flotilla intervida por Israel "dá vergoña". Así, valorou as manifestacións en Europa a favor do pobo palestino e esixiu a ruptura de relacións diplomáticas e comerciais co país de Oriente Próximo.
"Escoita a UE o clamor e a dignidade das rúas que desde Santiago de Compostela ata Ámsterdam piden que se acabe o xenocidio de Israel en Gaza? Non. Que fixo a UE por defender a valentía das persoas que foron na flotilla humanitaria, arriscando as súas vidas para denunciar o xenocidio? Nada", afeou a eurodeputada galega.
Por iso, segundo trasladou o Bloque en nota de prensa este martes, Miranda engadiu que a poboación en distintos países está "a dicir nas rúas" que a posición da UE ante as accións israelís "dá vergoña". A eurodeputada tamén incidiu en que o "xenocidio en Gaza está a mover o mundo" e o que suceda "condicionará as relacións internacionais e os dereitos humanos".
