Colapso das viaxes do Imserso ante a gran demanda: "Xa non é cuestión de escoller, senón un pouco do que haxa"

O Imserso viviu o seu 'día grande' con numerosas persoas facendo cola desde as oito da mañá e unha gran cantidade de destinos esgotados. Fóra dos locais a frustración crece: "todos os anos igual, Galicia sempre é a última en elixir". "Isto é unha vergoña, unha tomadura de pelo", exclamou un dos acreditados para a segunda xornada do Imserso, na que as complicacións para escoller o destino desexado e as "prazas insuficientes" son constantemente citadas polas persoas da cola.

Todos coinciden en "a ver o que queda" aínda que sen "moitas esperanzas". Algunhas xubiladas, como Purificación, xa teñen a vista posta nas próximas semanas. "Eu despois miro en Internet, porque o primeiro día é un pouco imposible conseguir viaxes, xa ves a cantidade de xente que hai", explicou. Entre as súas preferencias atópase a costa de Barcelona ou algunha capital de provincia, "por exemplo Sevilla ou Navarra". "Eu son viúva e levo xa varios anos no Imserso. Sempre que podo fago tres ou catro viaxes ao ano", comentou.

Aínda que esa posibilidade parece desvanecerse, "con facer unha viaxe doume cun canto nos dentes", expresou Dolores, quen sinalou que "sempre lle toca escoller viaxe na segunda quenda". Un método cuestionado pola gran maioría, que consideran que "é inxusto e debería de rotar". "Cada comunidade ten as súas viaxes o que pasa é que somos moitos para un cacho de carne", subliñou Marisa, engadindo que "hai oitocentas mil e pico prazas e cinco millóns de xubilados".

Neste contexto, o director da axencia de viaxes Btravel, José Manuel Rivas, sinalou que neste momento as dispoñibilidades están "totalmente esgotadas", así que o que fan é dicirlle á xente que de cando en vez pase por aquí para botar unha ollada por se hai algunha praza que aparece. "O que tentamos fundamentalmente é que onde podamos conseguir unha praza, reservala e despois se o cliente a quere, ben ,e se non, pois a cancelamos", ampliou. En palabras de Rivas, "xa non é cuestión de escoller, senón un pouco do que haxa".

Colas nunha axencia de viaxes de Santiago polas viaxes do Imserso | Fonte: Europa Press