Convocan a unha manifestación independentista o 25 de xullo
A mobilización, impulsada por persoas individuais, partirá da Alameda de Santiago ás 12.30.
Por Galicia Confidencial | Compostela | 12/07/2016 | Actualizada ás 10:30
Diferentes persoas a título persoal, aínda que ligadas a colectivos independentistas, convocan a unha mobilización para o vindeiro 25 de xullo baixo o lema 'Pola independencia nacional. Contra a repressom e polas liberdades democráticas plenas'.
Esta manifestación sairá da Alameda de Compostela a partir das 12.30 horas e rematará na Praza do Toural. A convocatoria desta mobilización xa se fixo pública o pasado sábado 2 de xullo nunha presentación celebrada no mosteiro de San Martiño Pinario na que se presentaron os obxectivos políticos desta protesta.
"É tempo de pormo-nos em pé. É tempo de afirmarmos sem ambigüidades e com contundência que Espanha é a ruína da Galiza, que o Estado espanhol nom é reformável e que só rompendo amarras com Espanha, dum modo unilateral, o nosso país poderá alcançar algum dia um futuro digno e livre. O colonialismo espanhol é o primeiro inimigo a derrotar se queremos viver numha naçom que ofereça condiçons de vida digna às suas mulheres e os seus homes", recolle este manifesto no que se di que a vía automista pola que apostaron outras organizacións nacionalistas "está xa esgotada".
Nesa presentación tamén se acordou que nos días que quedan ata o 25 de xullo se celebren asembleas abertas en todas as comarcas do país para organizar unha intensa campaña propagandística que anime a participar nesta mobilización independentista. Este é o vídeo dese acto:
