Por Galicia Confidencial | Santiago | 13/07/2016 | Actualizada ás 14:00
A entrada de especies invasoras en ecosistemas forestais de Galicia nos que se producen incendios recorrentes é un feito demostrado. Así o conclúe un estudo científico no que se salienta que "o lume facilita a entrada de moitas destas especies".
'Regeneración post-fuego en relación con la severidad del incendio en un área atlántica de Galicia. Bases para la restauración' é un estudo que vén de ser publicado en Cuadernos de la Sociedad Española de Ciencias Forestales feito por investigadores da Área de Ecoloxía do Departamento de Bioloxía Celular e Ecoloxía da Universidade de Santiago de Compostela, no Campus Vida, e do Departamento de Ciencias e Ingenierías Agrarias da Universidad de León, no campus de Ponferrada.
O estudo centrouse en determinar a relación entre a severidade do lume e o estado da vexetación postfogo, a entrada de especies invasoras arbóreas e a necesidade de aplicar medidas de restauración. Para iso tomouse como caso de estudo o monte Serres, unha área costeira da Coruña na que en marzo de 2014 se produciu un incendio de 18 hectáreas nunha masa de Pinus pinaster Aiton e Ulex europaeus L. Como explican os autores do estudo, previamente, só existían nas proximidades 14 individuos adultos de Acacia longifolia (Andr.) Willd que non foron afectados polo lume. Mediante a análise de datos de información xeográfica elaborouse un mapa de severidade do lume da área incendiada, diferenciándose dúas zonas: unha de baixa severidade e outra de alta severidade. Nesas dúas zonas establecéronse dez parcelas de 30m x 30m nas que se rexistraron: densidade de plántulas de P. pinaster e de A. longifolia, grao de afectación do chan e dos estratos de vexetación.
Os científicos detectaron unha relación entre a densidade de plántulas de piñeiro post-incendio e a cobertura de piñeiros preincendio, e unha relación entre a severidade e o tipo de vexetación resultante. A densidade de plántulas de acacia post-incendio foi media na zona de alta severidade e nula na de baixa severidade.
"Na área de piñeiral denso hai moitas plántulas de piñeiro xeradas e non se requiren labores de restauración, mentres que a expansión de plántulas de piñeiro desde o piñeiral denso a zonas limítrofes é reducida. A invasión de acacia no piñeiral denso foi moi abundante, polo que se discute a necesidade de tomar as medidas oportunas para favorecer ao piñeiral e controlar a expansión da acacia", cuxa entrada puido ser favorecida pola "elevada severidade do incendio en determinadas áreas", ao r"educir a intensidade da rexeneración da vexetación previa ao lume", conclúen os expertos.
-------------------------------------------------
García-Duro J. , Manso A. , Cruz O., Basanta M., Casal M., Reyes O. (2016). 'Regeneración post-fuego en relación con la severidad del incendio en un área atlántica de Galicia. Bases para la restauración'. Cuadernos de la Sociedad Española de Ciencias Forestales, 42: 129-140.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.