Bascuas di que “o galeguismo está só en Compromiso e en ningún lugar máis”
O candidato de Compromiso por Galicia á presidencia da Xunta, Xoán Bascuas, reivindicou este luns, na celebración do Día Nacional de Galicia, o papel de "forza propia e sen dependencias" da formación.
Por E.P. | SANTIAGO DE COMPOSTELA | 25/07/2016 | Actualizada ás 17:58
O candidato de Compromiso por Galicia á presidencia da Xunta, Xoán Bascuas, reivindicou este luns, na celebración do Día Nacional de Galicia, o papel de "forza propia e sen dependencias" da formación, ao tempo que asegurou que "o galeguismo está só en Compromiso e en ningún lugar máis".
Nun acto no parque Eugenio Granell de Santiago, Bascuas adiantou que un dos obxectivos da formación de cara ás próximas eleccións autonómicas será "desenmascarar" o Partido Popular, por "ocupar o galeguismo en fraude de lei".
En contraposición, Xoán Bascuas reivindicou este espazo para Compromiso pola necesidade dunha "forza propia". "Somos os depositarios da autoestima do pobo galego e temos que asumilo con corazón", resumiu.
A intervención do tamén secretario xeral foi precedida das palabras dos candidatos por Lugo, Juan Carlos Piñeiro, Ourense, Xosé Mosquera, e Andrés Núñez, por Pontevedra. Todos coincidiron na "necesidade" e na "convicción" de que Compromiso por Galicia "obterá representación" no Parlamento de Galicia.
O voceiro do PNV no Parlamento, Aitor Esteban, tamén estivo presente nesta xornada para trasladar a "relación especial" entre ambas as dúas formacións.
