SANTIAGO DE COMPOSTELA | 25/07/2016 | Actualizada ás 19:25 por EUROPA PRESS
A secretaria xeral de Podemos Galicia, Carmen Santos, reivindicou, con motivo da celebración do 25 de xullo, o traballo realizado polas forzas da esquerda nacionalista dende principios do século pasado e proclamou que "a patria de Podemos é a xente".
A dirixente galega da formación morada pasou o día na súa parroquia natal de Queiruga, en Porto do Son, rodeada da súa familia, amigos e compañeiros dos círculos de Podemos da bisbarra do Barbanza.
"Podemos non só admira e recoñece o traballo desta xente (as forzas da esquerda nacionalista, que moitas veces traballaron no exilio e na clandestinidade), senón que apoia a celebración deste día e tamén consideramos que debemos seguir celebrando con ese valor simbólico que ten máis que nunca en 2016", remarcou.
No seu manifesto polo "Día Nacional de Galicia", tamén quixo subliñar a "aposta de Podemos polo estado plurinacional". "Nós cremos na creación dun estado plurinacional, pero nun estado que pon o centro das súas políticas non soamente na defensa do territorio, senón na defensa da xente que vive nel, porque consideramos que ten que construirse un estado xusto, igualitario e equitativo", incidiu.
"A nosa patria son os mariñeiros, os gandeiros, é o persoal da sanidade, o persoal do ensino e a xente que traballa nas pequenas empresas, son os autónomos, os empregados do fogar, a xente que non traballa, e a que quere traballar", proclamou Santos.
A líder da formación morada en Galicia manifestou que quere que "todo o mundo poida ser partícipe dun día tan importante" para Galicia "e máis neste ano 2016, que vai ser outra vez clave na historia de Galicia cun novo cambio político e unha revolución democrática que se vén dende 2014". "A Nosa patria é a xente", proclamou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.