O conselleiro de Sanidade asegura que os datos das listas de espera "son os mellores dende que hai rexistro"

O conselleiro de Sanidade, Jesús Vázquez Almuiña, sinalou que os datos actuais de listas de espera no Sergas "son os mellores dende que hai rexistro", o que, na súa opinión, se debe ao "magnífico" traballo dos profesionais sanitarios e aos investimentos do Sergas.

Así o indicou preguntado polos medios este martes en Santiago, tras a sinatura dun acordo coa Federación Galega de Municipios e Provincias (Fegamp), e sinalou que o "traballo está feito" neste ámbito, que as listas de espera son "transparentes" e que os resultados do Sergas ao respecto se atopan entre "os mellores de España".

Tamén afirmou que non existe ocultación respecto ao número de pacientes que se operan nos centros concertados e que estes só representan unha "pequena parte" do total.

Ademais, respecto a petición sindical de que compareza no Parlamento de Galicia para explicar os resultados o conselleiro explicou que está disposto a ofrecer os datos solicitados, pero que será "difícil" comparecer no Parlamento debido á próxima "finalización do período parlamentario".

Así mesmo, cuestionado acerca da data de comezo das obras do centro de saúde do barrio compostelano de Conxo, os terreos da cal xa foron adquiridos, o conselleiro indicou que, en primeiro lugar, se deberá proceder á revisión dos asuntos "pendentes" en Galicia e actualizar os datos ao respecto .