O tráfico de mercadorías nos portos galegos aumentou un 11% no primeiro semestre de 2016

O volume de tráfico de mercadorías nos 122 portos de titularidad autonómica creceu no primeiro semestre do ano un 11% respecto aos datos rexistrados no mesmo período de 2015. Desta información decatouse no consello de administración de Portos de Galicia celebrado esta semana.

En concreto, a cifra de movemento de mercadorías entre xaneiro e xuño de 2016 foi de case 869.000 toneladas, dato que supón un incremento de case 86.000 toneladas en termos netos respecto ao ano anterior.

Nunha análise porto a porto, as dársenas con maior volume de tráfico de mercadorías foron, respectivamente: Ribadeo, con máis de 232.300 toneladas; Cariño, con case 207.000 toneladas; e Cee, con case 185.000. Tamén destaca o caso de Viveiro-Celeiro, que rexistrou nos seis primeiros meses do ano o movemento de máis de 62.400 toneladas de mercadorías, un 36% máis que o ano anterior.

Respecto á descarga de pesca fresca, nos portos dependentes da Xunta descargáronse ata o 30 de xuño máis de 46.500 toneladas de peixe. O importe total da venda en lonxa aumentou ata case os 122 millóns de euros, un 10,6% máis que no primeiro semestre de 2015.

Os portos con maior volume de descarga de pesca fresca foron: Ribeira, con máis de 13.200 toneladas; Burela, con máis de 12.100, e Celeiro-Viveiro, que superou as 8.500.