Por Manuel Vilas | Santiago de Compostela | 25/08/2016 | Actualizada ás 08:00
Democracia Ourensana é quen parte con máis opcións entre os partidos pequenos, polo menos en teoría. Os populistas que lidera Gonzalo Jácome sacaron case 15.000 votos. Viñan sobre todo na cidade de Ourense, pero tamén doutros dous concellos veciños, O Pereiro de Aguiar e Barbadás. Na primavera de 2015 estes independentes lograron o 7,82% dos votos na provincia. Moi por riba do mínimo fixado na lei electoral para o Parlamento de Galicia, que é do 5% por provincia. Ademais, daquela só se presentaban en tres concellos e agora poderanos votar toda a provincia.
Ao seu favor xoga tamén que non sufriron desgaste algún, pois non gobernan en ningures e pasaron de competir nas xerais. Fieis ao peculiar estilo Jácome, seguen a ser un ariete opositor aló onde participan, tanto nos municipios como na oposición.
Na súa contra xoga que o cartel non é Jácome -famoso en todo Ourense polas súas diatribas en Auria TV-, senón unha persoa moito menos coñecida. Trátase de José Miguel Caride, que se define así mesmo como "polifacético ourensano de 51 anos, avogado, músico, asesor político e xurídico de D.O., e actualmente inmerso tamén como produtor da película-musical Rebel”. De repetir o volume de votos das locais, case seguro logran un deputado. E se conseguen un representante, a cor do goberno pode depender deles.
Votación clave para Compromiso por Galicia
Estas eleccións resultan clave para o partido galeguista tras un período complicado. Moitos dos seus membros proveñen do BNG, ao igual que parte da militancia de ANOVA e as mareas. Algúns dos que foron os seus principais referentes (como por exemplo o ex-senador Pérez Bouza) pasaron este ano a apoiar as confluencias cidadáns de En Marea.
Estas marchas son produto dun debate interno no que a militancia votou en varias ocasións presentarse en solitario fronte aos chamamentos dalgúns dirixentes a coaligarse coas mareas ou co Bloque. Así as cousas, estas eleccións permitirán avaliar se Compromiso ten opcións reais de ser un actor influínte na política galega máis alá de certos concellos (goberna por exemplo en Lalín e ten concelleiros noutra ducia de municipios,sumando 41 edís en total).
Os galeguistas téñeno complicado en teoría para entrar no Pazo do Hórreo. Nas eleccións locais de 2015 -que suponse eran máis favorábeis para eles ca as autonómicas deste setembro- sacaron case 18.000 votos en todo o país. Isto é a penas o 1,2%, lonxe da barreira do 5%. Os seus cabezas de cartel son o líder autonómico Xoan Carlos Báscuas pola Coruña, Juan Carlos Piñeiro por Lugo, José Mosquera por Ourense e Andrés Nuñez Rajoy en Pontevedra.
Os animalistas liderados por mulleres
Outras que abofé recollerán miles de votos son as do Partido Animalista. Nas xerais de hai dous meses apañaron máis de 16.000 sufraxios, o 1,07% do total. Beneficiáronse dos descontentos con outras opcións, pois aumentaron 3.000 dende as xerais de decembro de 2015. As súas cabezas de cartel son todas mulleres. María Luisa de Ceano-Vivas Hernández pola Coruña, Noelia Pena Ramos en Lugo, Paula Rodríguez Méndez en Ourense e Sheila García Núñez en Pontevedra.
Os máis pequenos entre os máis pequenos
Os liberais de Converxencia Vinteún -que se presentan por todas as provincias menos Ourense-, Escanos en Branco -que só se presenta en Pontevedra e que nas pasadas autonómicas recollera case 17.000 sufraixos, o 1,2% do total-, e a agrupación de electores Recortes Cero-Grupo Verde -na que participa a veterana Unificación Comunista de España- son outras papeletas que soarán de pasadas eleccións aos cidadáns que vaian a votar o 25 de setembro.
Ganemos Galicia, Comunistas da Galiza, Unidos por el Futuro, Cidadáns-Centrum (no que participan membros de Ciudadanos que marcharon do partido laranxa tras a polémica do candidato á Xunta), Partido Libertario, o novo partido Vía Nova Galicia, Acción Democrática Ciudadanos de Galicia, Alternativa Independiente de Galicia e Partido Anticorrupción y Justicia completan a lista de opcións para o 25S.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.