As obras de reparación da rede de saneamento da rúa Armanya de Lugo comezan este luns

As obras de reparación da rede de saneamento da rúa Armanya de Lugo, que dá servizo a uns 100 veciños, comezarán este luns, día 29, e contan cun presuposto de 31.500 euros.

Deste modo, aspírase a garantir as boas condicións deste servizo e dar resposta ás demandas dos veciños a este respecto, segundo explicou o Concello de Lugo nun comunicado.

O concelleiro de Educación e Infraestruturas Urbanas, Manuel Núñez, indicou que o obxectivo destes traballos é rematar coas filtracións que se producen nesta rúa e que afectan a algún dos edificios. Para iso, será necesario levantar o pavimento.

Ademais, o ente local recolocará un cadro eléctrico situado na mesma rúa durante as obras, que contarán coa correspondente supervisión arqueolóxica durante a súa execución.