Canto custa quentar as dependencias da Xunta?

Quentar a gran cantidade de centros administrativos dependentes da Xunta de Galicia non é unha tarefa nada fácil, nin moito menos, barata. O Goberno galego acaba de sacar a concurso a subministración de combustible de calefacción, gasoleo C, aos centros de consumo da rede de enerxía da xunta de Galicia (Redexga).

Un contrato que supera os catro millóns de euros para os dous vindeiros anos e que ten coma obxectivo regular o réxime de contratación centralizada e a distribución de competencias para a contratación da subministración enerxética dentro da da Xunta.

O contrato divídese en 4 lotes, correspondéndose cada un deles cunha das 4 provincias galegas. Así, o lote 1, que se corresponde con A Coruña, ten 92 centros e un gasto de case un millón de euros en calefacción. En Pontevedra hai 78 centros, que aínda que menores en número aos da Coruña, consumen máis, case 1.4 millóns de euros. En Ourense hai 66 centros que consumen case 909.000 euyros e en Lugo, 45 cun gasto de 805.0000 euros.

A suma dos consumos anuais é de case 3.7 millóns de litros ao ano, que representa as necesidades de combustible para calefacción previstas inicialmente para os 281 centros de subministración da Xunta. O custe total para dous anos de licitación do contrato de subministración de gasóleo C é de 4.038.112,60 euros segundo recolle o prego de condicións do contrato ao que tivo acceso GC.

Esta contratación chega, ademais, cando a Xunta quere modificar o sistema de calefación de gasóleo de moitas das súas dependencias co sistema de pelets. Un novo sistema que, ademais, está a subvencionar para a instalación en domicilios particulares.