Por E.P. | VIGO | 31/08/2016 | Actualizada ás 13:55
O alcalde de Vigo, Abel Caballero, confirmou este mércores que o próximo sábado, ás 13,00 horas, estará a participar na manifestación-romaxe convocada pola Xunta de Persoal do Chuvi en defensa da sanidade pública e polo rescate do Hospital Álvaro Cunqueiro, polo que non acudirá á décima edición da Festa do PSdeG, que se celebrará no concello coruñés de Oroso.
Nunha rolda de prensa, e preguntado polos xornalistas sobre se acudiría ao acto do seu partido, no que participará o secretario xeral, Pedro Sánchez, o rexedor limitouse a ratificar que ese día, a esa hora, estaría na manifestación a favor da sanidade pública, que está "convocada dende hai tempo" e que ten o seu "apoio".
O acto do sábado en Oroso supón a recuperación dunha tradición para os socialistas galegos, que pretenden reunirse nun acto político e, á vez, lúdico aberto a cargos e militantes do PSdeG.
Trátase dun encontro con comida campestre incluída (a 10 euros cada participante) no que, ademais da intervención de Pedro Sánchez, falará tamén o candidato do PSdeG á presidencia da Xunta, Xoaquín Fernández Leiceaga.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.