Feijóo defende que un imputado por corrupción pida o voto para el

“Non ten ningún cargo no partido. Estaba nun mitin e falou”, di sobre a participación de Rafael Louzán nun mitin en Cambados. Critica ao alcalde de Vigo e os seus concelleiros porque eles, di, “si están imputados” e teñen cargos públicos.

Por Galicia Confidencial | Compostela | 16/09/2016 | Actualizada ás 10:22

Comparte esta noticia

O presidente da Xunta en funcións e candidato do PPdeG nos comicios do 25S, Alberto Núñez Feijóo, saíu este xoves en defensa de quen foi un dos seus pesos pesados en Pontevedra, Rafael Louzán, ex presidente da Deputación de Pontevedra e ex presidente provincial do PpdeG, cargo que tivo que deixar pola súa imputación por cohecho continuado e suborno mentres era presidente do organismo provincial.

Feijóo canda Louzán na primeira fila do mitin do PP en Pontevedra
Feijóo canda Louzán na primeira fila do mitin do PP en Pontevedra

A pesar da súa situación xudicial –Louzán está a piques de ser xulgado--, Feijóo non tivo problemas en sentar ao seu carón nun mitin que tivo lugar este mércores en Cambados e aplaudir ao ex presidente provincial que tamén saíu ao estrado a pedir ao voto para el e o PP. “A persoa á que se refire non ten ningún cargo no partido”, dixo ao ser preguntado por GC. “Pero segue sendo militante”, preguntouselle. “ Supoño que será militante, non o sei”, respondeu, “estaba nun mitin e falou”.

Para tentar defenderse, Feijóo cargou contra os socialistas. “Onte houbo un mitin en Vigo e estivo o secretario xeral do PSOE. Alí estaban alcaldes, concelleiros imputados”, dixo sobre a implicación destes na Operación Patos. “Se poden falar aqueles que están na vida pública, exercendo cargos, pero imputados, non vexo a proporcionalidade que fale xente que non ten xa ningún cargo político, público e ningunha responsabilidade”, engadiu sobre Louzán.

O presidente galego en funcións dixo isto xusto despois de defender a decisión adoptada pola ex alcaldesa de Valencia, Rita Barberá, de abandonar o PPdeG pero sen deixar a súa acta como senadora. “Decidiu abandonar o partido, decisión que comparto, e a nivel persoal terá que dar as decisións que considere oportunas”, engadiu.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta