A Xunta valora a intención de catro cooperativas de unirse e destaca "a necesidade dun gran grupo" lácteo

A Consellería de Medio Rural felicitou as cooperativas Feiraco, Os Irmandiños, Melisanto e Xallas pola súa intención de integrarse nun grupo de referencia no sector lácteo que comece a operar dende o 1 de xaneiro de 2017.

Despois de que este luns as cooperativas presenten este proxecto -que deberá ter luz verde das súas respectivas asembleas o 31 de outubro-, o Goberno galego destacou nun comunicado que esta decisión "coincide coa filosofía que sempre defendeu a Xunta de contar cun gran grupo que lidere o sector leiteiro en Galicia para defender os intereses de todos os elos da cadea".

Neste sentido, subliña que "é o camiño a seguir" para lograr estabilidade no sector e un abaratamento de custos, no marco dunha iniciativa que agrupará máis de 4.000 gandeiros, cunha produción de 410 millóns de litros de leite.

"Esta unión axudará a organizar un sector clave para Galicia e apostará pola industrialización dentro do noso territorio, unha peza tamén crucial para ser líderes no ámbito leiteiro," agrega o departamento que dirixe Anxos Vázquez.