"Seremos un club rico"

“Estabilizamos o barco e camiñamos cara a bo porto. Acabaremos sendo un club rico”. Malia a difícil situación económica do Deportivo, sacou peito Tino Fernández sobre a súa recuperación paseniño. “Se seguimos en Primeira, o groso da débeda pódese acabar en tres anos”. Na súa terceira xunta de accionistas, o consello de administración, que sacou adiante case por unanimidade todos os puntos do día, aprobou un orzamento de case 56 millóns de euros, tras presentar uns beneficios récord de 6,7 millóns na pasada, unha obriga para facer fronte aos compromisos adquiridos no concurso de acredores.

Son, segundo as verbas de Tino Fernández, “os mellores resultados da historia do club”, que lle permiten rebaixar a débada dos 100 millóns. O dirixente deportivista destacou a baixada dun 8% ata os 95,5 millóns, despois dos máis de dez abonados aos bancos e á Axencia Tributaria.
Deste xeito, Tino Fernández augurou un futuro prometedor para o Deportivo. “Conseguirémolo, acabaremos sendo un club rico”, dixo o presidente, que criticou ao anterior consello de administración por non ter entrado antes en concurso de acredores: “Teriamos débeda cero e títulos”, aventurou.

O presidente deportivista anunciou a creación inminente dunha Fundación do club aproveitando o 110 aniversario e co obxectivo de devolverlle á sociedade todo o que esta lle aporta. A fundación terá un carácter social e solidario, e custodiará o patrimonio histórico do Deportivo.

Durante a xunta de accionistas, Tino Fernández destacou fronte ás críticas o esforzo do club para tentar reforzar e profesionalizar a canteira e defendeu a legalidade da pancarta dos Riazor Blues que Antiviolencia persegue e sanciona. A xunta xeral de accionistas contou coa presenza de 157 accionistas, con 1.696 accións propias e 41.431 accións representadas (en total, 1.146 accionistas representados), cun total de 2.591.932 euros de capital presente e representado, o 27,48% do capital social.