Por gcdeportes | Compostela | 04/12/2016 | Actualizada ás 13:39
En maio foi a Irmandinha masculina contra Venezuela en Riazor, pero o regreso estaba incompleto, e agora chega o turno para a Irmandinha feminina, un regreso que será realidade o vindeiro xoves 22, día no que a Selección Galega feminina absoluta xogará contra a potente Cataluña, logo do acordo alcanzado por ambas as dúas federacións.
O Estadio municipal da Lomba, en Vilagarcía de Arousa, é o lugar elixido para albergar este partido, comprometido pola Federación Galega de Fútbol para este ano. En primeiro lugar polo interese amosado polo Concello de Vilagarcía en acoller o encontro e tamén por ser sede dun dos clásicos do fútbol feminino do país, o Atlético Arousana, de onde saiu unha das mellores futbolistas galegas, a dianteira do Valencia Mari Paz Vilas.
Federación e Concello pecharon o acordo nos últimos días e A Lomba convertirase no centro de atención do fútbol galego, co choque que contará cunha decena de internacionais, como as galegas Vero Boquete, este ano no PSG francés, e a propia Mari Paz Vilas. O partido dará comezo ás 19:00 horas e será retransmitido en directo polas televisións de Galicia e Cataluña.
A presentación oficial do partido levarase a cabo nos vindeiros días e será aí cando a FGF amplíe a información sobre o precio das entradas, o sistema de venda e todo o relativo ó encontro.
A dirección deportiva da Federación decidiu que sexan os propios adestradores das seleccións galegas femininas de base os que asuman tamén a dirección técnica da Selección Absoluta. Quin Valbuena (seleccionador sub-18) e Susú Cores (seleccionadora sub-12) formarán un tándem técnico, mentres que Edu González (seleccionador sub-16 e licenciado en INEF) realizará a función de preparador físico do equipo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.