Os ópticos galegos avisan de que as luces de Nadal poden producir cegamentos e accidentes de tráfico

O Colexio de Ópticos-Optometristas de Galicia advirte de que as luces de nadal instaladas na rúa poden "producir cegamentos e causar accidentes de tráfico". Neste sentido, a entidade colexial explica que unha das consecuencias da iluminación nocturna poden ser os cegamentos dos condutores que circulan polas rúas. "Polo menos o 70 por cento dos condutores sofre cegamentos ao volante. No caso de persoas con trastornos da visión e maiores de 50 anos son máis acusados e poden ocasionar accidentes", destacou o presidente do Colexio galego, Eduardo Eiroa. Por iso, recomenda "extremar a precaución" nestes días festivos con motivo do Nadal nos que se incrementa o número de desprazamentos nocturnos.

Ademais, os especialistas indican que, nalgúns casos, os cambios repentinos de luminosidade presentan "certos inconvenientes para persoas especialmente sensibles aos cegamentos" e, sobre todo, nas afectadas por cataratas. Segundo engaden, un dos síntomas iniciais das persoas con cataratas é que, ademais de ver máis borroso e as cores máis apagadas ou amarelentas, as luces poden causarlles máis cegamento do habitual.

Neste sentido, a entidade colexial subliña que o risco de sinistros durante a condución "é maior en persoas afectadas por defectos refractivos da visión como hipermetropía, astigmatismo, miopía e tamén os pacientes de glaucoma" que "teñen problemas de adaptación da pupila e con iso aumenta o tempo de resposta ao cambio de luz", segundo concreta Eiroa.

Tamén son especialmente sensibles aos cegamentos as persoas con ollos claros, "debido a que a súa cantidade de melanina no iris é menor", segundo engade.

Por outra banda, o Colexio de Ópticos-Optometristas de Galicia recorda aos condutores que o alcol e outras substancias estupefacientes "provocan diminución de reflexos, alteran a percepción visual ao volante e causan visión borrosa e dobre".