Abanca pecha a venda da súa parte de Tecnocom

Abanca e varios accionistas de Tecnocom comprometéronse irrevogablemente a aceptar a oferta pública de adquisición (OPA) de accións lanzada por Indra e acordaron a venda do 52,7% do capital que controlan na compañía por 168 millóns de euros aproximadamente.

En concreto, os accionistas de Tecnocom son titulares dun total de 39,54 millóns de accións da sinatura, equivalentes ao 52,7% do capital, estando o 20% en propiedade da entidade financeira galega, segundo informou a compañía de consultoría e tecnoloxía este mércores á Comisión Nacional do Mercado de Valores (CNMV).

A semana pasada, Indra anunciou o lanzamento dunha OPA polo 100% do capital de Tecnocom por un importe de 305 millóns de euros, excluíndo autocarteira, a razón de 4,25 euros por acción. Desta forma, Abanca e o resto de accionistas que controlan o 52,7% de Tecnocom cobrarán 168 millóns de euros tras a venda das súas accións a Indra.

A operación instrumentarase mediante unha oferta mixta de efectivo (60%) e accións de Indra (40%), valoradas a 9,8461 euros. Iso supón 2,55 euros en efectivo e 0,1727 accións de Indra por cada acción de Tecnocom.

O importe en efectivo máximo a desembolsar por Indra polo 100% do capital de Tecnocom ascende a 191,3 millóns de euros aproximadamente.

A operación está condicionada á aprobación das autoridades de competencia, á aceptación dun mínimo do 50,01% do capital de Tecnocom (excluíndo os acordos irrevogables asinados por accionistas que representan o 52,7% de Tecnocom), á aceptación dun mínimo do 70,01% do capital social total e á aprobación por parte da xunta xeral de accionistas de Indra do aumento de capital relacionado coa transacción.

O peche da operación está previsto para o segundo trimestre de 2017.