Por E.P. | SANTIAGO DE COMPOSTELA | 27/12/2016 | Actualizada ás 10:56
O Grupo popular rexeitou que compareza o presidente da Xunta, Alberto Núñez Feijóo, no pleno que se celebra no Parlamento galego, tal e como demandaron os grupos da oposición, para "explicar por que mantén no cargo" no Sergas a Félix Rubial e Carolina González-Criado, aos que a Audiencia Provincial de A Coruña instou a investigar no procedemento aberto pola subministración dos tratamentos aos enfermos de Hepatite C por un suposto delito de homicidio en seis dos oito casos que inclúe a causa.
Ao comezo do pleno, a voceira parlamentaria do BNG, Ana Pontón (BNG) reclamou alterar a orde do día da sesión co fin de que Feijóo dea explicacións, tal e como tamén fixo Luís Villares (En Marea). Petición á que tamén se sumou o Grupo socialista en palabras de Xoaquín Fernández Leiceaga.
De tal forma, o presidente da Cámara, Miguel Santalices, deu luz verde a unha votación do pleno para decidir se se accedía a esa alteración da orde do día, nunha petición rexeitada polos deputados populares, fronte aos votos a favor da oposición.
A sesión arrancou con Santalices enviando o "apoio" e "solidariedade" da Cámara ao deputado socialista Raúl Fernández, ausente da Cámara despois de que a súa filla falecese o luns en accidente de tráfico.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.