O alcalde de Ferrol valora o contrato de Navantia, pero lamenta que beneficiará a "unhas poucas empresas auxiliares"

O alcalde de Ferrol, Jorge Suárez, valorou o recente contrato asinado entre Navantia e Iberdrola para a construción de 42 'jackets' do parque eólico mariño East Anglia One porque "toda carga de traballo ten que ser valorada positivamente". Non obstante, lamentou que o proxecto beneficiará a "unhas poucas empresas auxiliares".

"Non imos ser tan pouco intelixentes como para dicir que é negativo para a bisbarra que haxa novos pedidos para os estaleiros públicos", sinalou, ao tempo que destacou que todos deben felicitarse por este encargo. Non obstante, preguntouse "por qué Astano non pode facer un barco" e se hai algún proxecto para que o estaleiro de Fene (A Coruña) regrese á construción naval.

Neste sentido, o alcalde de Ferrol indicou que concorda co ámbito sindical, que alerta de que o que acontece en Navantia Fene é "un aluguer de terreos" porque na práctica "non supón carga de traballo para os miles de desempregados que houbo no último lustro no sector naval". Así, Suárez estimou que se beneficiarán "unhas poucas empresas auxiliares nun número moi reducido".

Aínda que non dubida de que toda actividade industrial pode conseguir facer gañar en prestixio ao estaleiro, Suárez bota en falta un plan industrial para Navantia e un presidente que "tome o rumbo da empresa".

Un rumbo que estea "máis alá do modelo produtivo que quere equiparar ao sector aeronáutico ou ao sector da automoción, e que está a destruír totalmente ás empresas pequenas e medianas do sector auxiliar da nosa bisbarra", afirmou o alcalde ferrolano.

Tamén reclamou Jorge Suárez que ese plan definido pase polo adiantamento "o máximo posible" da construción das fragatas F-110.

PLAN FORMATIVO

O rexedor da cidade naval anunciou que antes do Nadal fixo partícipe mediante carta o conselleiro de Industria, Francisco Conde, dunha das principais preocupacións do sector, que é o envellecemento do cadro de persoal e a falta de formación de novos cadros. E é que Suárez teme que cos novos pedidos "morramos de éxito por non ter cadros de persoal debidamente formados".

Conde asegurou na súa resposta que a Consellería desenvolve un plan formativo dentro dunha estratexia ampla que contempla os investimentos necesarios para que a construción naval galega se consolide na vangarda tecnolóxica e se mostra aberto a estudar as propostas que se poidan trasladar por parte do Concello.

Neste sentido, Suárez avanzou que convocarán ás organizacións sindicais e empresariais a unha mesa de traballo para participar neste plan formativo, que se debe desenvolver en instalacións relacionadas co sector como o Formega ou a través doutro tipo de modelos, "onde os veteranos poidan dar formación ás novas incorporacións, mesmo retomando o exemplo da escola obreira", estimou o rexedor.