Denuncian que o “amoreamento de pacientes” é debido aos “recortes do Sergas”

A Asociación Galega para a Defensa da Sanidade Pública atribúe o "amoreamento de pacientes" en servizos de urxencias de hospitais da rede pública autonómica á "política de recortes do Sergas".

Así o manifestoiu nun comunicado de prensa en relación a o aumento asistencial coincidente coa "epidemia de gripe", no que sostén que "o problema do amoreamento de pacientes afectados en corredores e salas dos servizos de urxencias é o recorte de máis de 400 camas, persoal sanitario (máis de 1.700) e centros de saúde asociados á redución do orzamento sanitario nun 18% nos últimos anos".

A asociación considera que eses recortes se estableceron para "cumprir co plan de austeridade e de redución da débeda imposta polo goberno de Rajoy".

"Esta situación vén a corroborar as advertencias que vimos realizando nos últimos anos sobre os riscos para a asistencia sanitaria e a sostenibilidade da sanidade pública, da política de recortes do Sergas,", indicou a Asociación Galega para a Defensa da Sanidade Pública.

Neste sentido, insiste en que "este colapso non ten que ver coa gravidade desta enfermidade que non supón ningún risco para a maioría da poboación" dado que, segundo engade, "as características do virus da gripe deste ano son similares aos de anteriores". Ademais, concretou que "grande parte das persoas máis expostas a complicacións está vacinada".

Por todo iso, a Asociación Galega para a Defensa da Sanidade Pública esixe "unha auditoría da situación" en Galicia, así como "a reposición dos recursos suprimidos".