A Deputación da Coruña difunde o cinema galego a través do programa 'Visións'

A Deputación da Coruña difundirá o cinema galego a través do programa 'Visións', dentro da súa Rede Cultural, segundo informou o ente provincial. A nova liña ten aberta o prazo de inscrición de propostas que rematará o 20 de xaneiro.

A Rede Cultural do organismo provincial inclúe, entre as súas novidades, un programa de cinema e contidos audiovisuais co nome 'Visións', destinado á programación dos concellos.

Cada municipio, poderá solicitar un máximo de oito proxeccións, das que un mínimo da metade deberán ser de produción propia galega.

O programa inclúe dúas seccións, unha para propostas xerais e outra para produción propia galega orientada ao apoio á difusión das películas, documentais ou creacións audiovisuais das empresas de ámbito galego, que poderán presentar as súas producións ata o 20 de xaneiro.