Máis de mil estudantes galegos participan nun programa educativo para dirixir a súa propia empresa en internet

Un total de 1.016 estudantes de 47 centros docentes de Galicia participan no programa educativo Young Business Talents, organizado por Nivea e Esic, e que incorpora nas aulas a aprendizaxe experiencial mediante a práctica, utilizando simuladores de terceira xeración de Praxe MMT.

Desta forma, Galicia é a terceira Comunidade Autónoma con maior número de participantes. As provincias galegas con maior participación son Pontevedra, con 503 alumnos, e A Coruña, con 255 estudantes.

No ámbito estatal, este ano 9.458 estudantes de 477 centros académicos de toda España súmanse a esta iniciativa. Este ano, as Comunidades Autónomas que máis representación teñen durante o programa Young Business Talents son: Andalucía, con 1.651 alumnos; Cataluña con 1.485; Galicia, con 1.016 e a Comunidade Valenciana, con 904 estudantes, que perseguirán o título de mellor empresario virtual do país.

Os alumnos dispoñen dun laboratorio experimental en economía e administración de empresas para aplicar a teoría e aprender pola experiencia. Desta forma, o programa formúlalles diferentes situacións que se dan nas empresas reais e teñen que tomar decisións que engloban as áreas de produción, finanzas, recursos humanos e mercadotecnia.

Desta forma, os mozos irán adestrando e aprendendo a xestionar e dirixir as súas propias empresas dun xeito dinámico que lles achega unha experiencia case real da economía para conseguir que a súa empresa de consumo masivo se converta na máis próspera do mercado virtual.

Para iso, incorporouse nos centros docentes, avanzados simuladores de terceira xeración. Desta forma, os alumnos experimentan máis de preto a iniciativa emprendedora e melloran o seu curriculum vitae. Desenvolven habilidades, competencias e actitudes construtivas co fin de axudar no futuro dos mozos.

"O obxectivo desta experiencia, que dura case un ano, é achegar aos alumnos dende as aulas a parte práctica que complemente a teoría grazas ao uso de simuladores virtuais" explicou o director de Young Business Talents, Mario Martínez, quen engadiu que, desta forma, "adquiren a capacidade para enfrontarse á xestión empresarial, o que supón un estímulo continuo de cara a orientar o seu futuro e desenvolver as súas habilidades".

O programa de formación Young Business Talents achega factores lúdicos e motivadores para os alumnos. Preséntase como unha competición na que, ata chegar á final presencial, que terá lugar no mes de maio en Madrid, os estudantes teñen por diante catro fases online eliminatorias para converterse no mellor empresario virtual do país.

Para superalas, os mozos divididos en equipos e cun profesor que lles asesora en todo momento, terán que poñer en práctica dende as aulas os seus coñecementos teóricos e aplicalos de forma práctica co uso dos simuladores, para tomar as mellores decisións relativas á empresa.

Os alumnos participantes, de 4º da ESO, Bacharelato e Formación Profesional competirán a nivel autonómico e enfrontaranse aos mellores de cada comunidade na final estatal para gañar o título de mellor empresario virtual do país. Segundo os puntos que vaian acumulando en cada unha das fases, o sistema do simulador determinará os resultados de cada empresa en función das estratexias da competencia.

Tras o "éxito", segundo destacan os impulsores, conseguido nas edicións anteriores, Young Business Talents consolídase como o único programa de aprendizaxe a través da práctica que se realiza en España". A competición foi recoñecida dentro da plataforma estratéxica europea de Rse Enterprise 2020, unha liña desenvolvemento que persegue, entre outros obxectivos, sensibilizar sobre o importante rol que as empresas poden desenvolver na sociedade e contribuír positivamente á competitividade de España, fomentando habilidades necesarias para o emprego a través dun enfoque sostible.

Na pasada edición, 347 estudantes divididos en 100 equipos chegaron á final presencial celebrada en Madrid, alzándose coa vitoria o equipo 'Prosperity Team' do Colexio Mare de Déu de l'Assumpció de Barcelona.