Obra, cruel desenlace

Ficha técnica
Obradoiro 81: Mickey McConnell (6), Dulkys (13), Bendzius (17), Shane Whittington (4) e Artem Pustovyi (12) –cinco inicial- Nacho Llovet (2), Rosco Allen (20), Santi Yusta (0), Txemi Urstasun (0) e Pepe Pozas (7).
Iberostar Tenerife 82: Rodrigo San Miguel (18), Grigonis (11), Will Hanley (10), Doornekamp (12), Bogris (8) –cinco inicial- Mamadou Niang (0), Fran Vázquez (2), Abromaitis (7), Davin White (14) e Ferran Bassas (0).
Parciais: 22-17, 19-25 (41-42), 21-20, 19-20 (81-82).
Árbitros: Pérez Pizarro, Sánchez Monserrat e Jordi Aliaga.
Incidencias: partido da 18ª xornada da Liga ACB disputado no Fontes do Sar ante 4.494 espectadores.

Foi outro Obra, unha versión moi mellorada, nada que ver co de hai unha semana contra Fuenlabrada. Pero tres últimos ataques desastrosos, fixeron ao equipo compostelán encaixar unha nova e dolorosa derrota. Uns pasos de Pustovyi, unha tripla de Dulkys, unha perda de balón de Mickey McConnell e un último ataque con sete segundos que non atinou Rosco Allen. Nada, e Tenerife gañou 81-82 cuhna tripla de Rodrigo San Miguel a 40 segundos do final. Sexta derrota consecutiva, e dúas finais nas dúas vindeiras semanas: visita a Estudiante e Manresa en Sar.

Foron igualados os primeiros minutos, cos puntos de Dulkys e Pustovyi e dúas triplas de Bendzius para os composteláns (16-13). Will Hanley e Rodrigo San Miguel evitaban a vantaxe local, pero catro puntos de Rosco Allen permitiron ao Obra acabar por diante o primeiro cuarto: 22-17.

Unha tripla de Pepe Pozas deu a máxima vantaxe aos composteláns (27-17), pero Tenerife reaccionou cun parcial de 0-7 malia a intensidade defensiva galega (27-24). Os de Moncho Fernández estaban mellor que o rival e mantiñan unha pequena renda (34-26, 39-32), ata que as triplas visitantes (Grigonis, Davin White, San Miguel e Doornekamp) igualaron o encontro. Tenerife foise a vestiarios tras un novo parcial de 0-7, e púxose á fin por diante: 41-42.

Trala reanudación, os canarios chegaron a ter oito puntos de vantaxe (50-58) tras un parcial de 0-8, pero Obradoiro colleu vida con tres triplas de Dulkys, case desaparecido ata o descanso. Unha canastra de Pustovyi devolveu a igualdade ao marcador con dez minutois por diante: 62-62.

Obradoiro abreu unha pequena fenda tras dúas triplas de Rosco Allen e Eimantas Bendzius (72-67), pero Tenerife respostou con outras dúas de Grigonis e Hanley (74-73). Igualdade máxima. Dous tiros libres de McConnell e os canarios que pasan máis de dous minutos sen anotar. Un 2+1 de Rosco Allen colocou o Obra catro arriba (81-77); unha canastra rápida de Bogris e os pasos de Pustovyi deron vida o Tenerife. Con 81-79, a falla de 40 segundos, San Miguel puxo por diante aos seus dende a tripla (81-82). Obradoiro tivo dous ataques para gañar, pero erraron Dulkys, McConnell e Rosco Allen. Malia a derrota, desta volta si, Sar despediu os seus cunha ovación e ao berro de “Obra, Obra”.