Por gcdeportes | A Coruña | 25/02/2017 | Actualizada ás 00:41
Ficha técnica
CB Miraflores Burgos 86: Brandon Brine (8), Álex López (0), Javi Vega (29), Dang Akodo (6), Huskic (10) –cinco inicial- Steinarsson (5), Álex Barrera (10), Edu Martínez (11), Jorge García (2) e Toncinic (5).
Leyma Coruña 89: Joan Creus (2), Ángel Hernández (10), Filip Djuran (10), Zyle (11), Sergio Olmos (14) –cinco inicial- Javi Lucas (4), Zach Monaghan (19), Justin Johnson (9), Tautvydas Sabonis (2), Larry Abia (5) e Mikulic (3).
Parciais: 17-20, 23-23 (40-43), 24-26, 22-20 (86-89).
Árbitros: Alberto Sánchez Ardid e Adrián Iglesias Ambrosio. Sen eliminados.
Incidencias: partido da 25ª xornada da LEB Ouro no pavillón do Plantío de Burgos.
Golpe de autoridade do Básquet Coruña na casa dun dos grandes favoritos ao ascenso. Tras dúas derrotas consecutivas, o Leyma venceu 86-89 en Burgos e sumou a 15ª vitoria na Liga, que lle serve para seguir na parte alta da táboa (na que perderon Gipuzkoa, Oviedo e Melilla), a tan só dous triunfos dos líderes. Decisivo foi Zach Monaghan cunha tripla de oito metros no último minuto con 84-84 no marcador. “Tivemos acerto, tivemos ritmo, e creo que gañamos de xeito merecido”, sentenciou Tito Díaz, que destacou, unha vez máis “o espíritu de equipo”.
Filip Djuran abriu o partido dende 6,75 e Coruña comezou por diante, pero dúas triplas de Javi Vega e Brine adiantaron a Burgos (12-11). Pero Leyma sumaba de tres en tres (triplas de Ángel Hernández e Justin Johnson e un 2+1 de Olmos) e acabou por diante o primeiro cuarto: 17-20.
Parcial de 0-5 para os galegos e Burgos parou o partido con 17-25. Pero a diferenza foise ata os 11 puntos e o técnico local volveu pedir tempo morto trala tripla do reaparecido Mikulic (24-35). Dúas triplas de Edu Martínez case consecutivas e foi Tito Díaz quen se viu obrigado a parar o partido (32-37). Ao Leyma costáballe anotar e Burgos apertou aínda máis o marcador para o tempo de lecer: 40-43.
Os locais puxéronse por diante (44-43), pero Coruña reaccionou da man de Zyle e Zach Monaghan, que sumou cinco puntos nun suspiro tras unha antideportiva de Álex López. Parcial de 2-12 e tempo dos casteláns con 46-55. Burgos tentaba achegarse de novo, pero Monaghan anotou dende case 9 metros (51-60). Foi Javi Vega, que terminaría con 29 puntos e 5/7 en triplas, quen apertou o marcador antes do último cuarto: 64-69.
Básquet Coruña entrou no asalto definitivo con dúbidas (dous minutos e medio sen anotar) e Burgos, tras dúas triplas e un parcial de 8-0, púxose por diante (72-69). Ende ben, reaccionou Zach Monaghan e o Leyma, e cun parcial de 0-9 devolveron a vantaxe aos galegos (72-78). Djuran anotou unha tripla (74-82), pero Burgos defendía con contactos e empatou o partido con dúas triplas de Álex Barrera e Edu Martínez (84-84). Tempo de Tito Díaz con 50 segundos, e Monaghan que se salta o guión para anotar dende máis alá dos oito metros (84-87). Javi Vega anotou dous tiros libres (86-87) e os árbitros se comeron unha falta sobre Monaghan, pero Álex López errou a tripla e Sergio Olmos puxo dende o tiro libre o 86-89 definitivo xa co tempo a cero.
Ficha técnica
CB Clavijo 83: Enric Garrido (7), Galarreta (10), Pressley (12), Bonifant (9), Kupsas (17) –cinco inicial- Carles Bravo (8), André Norris (8), Birgander (9), Alberto Martín (2) e Adrián Laso (1).
Marín Peixe Galego 77: Jorge Romero (10), Andrés Miso (15), Tim Derksen (17), Javi Múgica (13), Jason Cain (9) –cinco inicial- Marc Bauzá (2), Gabe Rogers (4), Manu Ferreiro (0), Gregorio Adón (7) e Albert Homs (0).
Parciais: 21-16, 14-14 (35-30), 19-18, 13-19 (67-67), 16-10 (83-77).
Árbitros: Ángel de Lucas e Cristián García Rodríguez. Eliminaron por cinco faltas persoais a Birgander nos rioxanos e a Jason Cain e Tim Derksen nos marinenses.
Chegou a estar once abaixo (63-52) no último cuarto, pero remontou nos últimos minutos cun parcial contundente de 2-15 para poñerse 65-67. Tivo a vitoria o Peixe Galego nun último ataque con 23 segundos, pero non entrou (67-67) e na prórroga foi sempre a remolque tras dúas triplas iniciais de Garrido e Bonifant. E CB Clavijo, rival directo pola permanencia, acabou impoñéndose por 83-77. Marín Peixe Galego queda penúltimo, en postos de descenso, con 6 vitorias e ademáis da vitoria de Clavijo (que suma 8), Magia Huesca venceu 77-70 a Oviedo tamén na prórroga e suma 7 triunfos. Quedan nove xornadas, noves finais para a salvación do Peixe Galego.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.