Dous feridos nun accidente de tráfico en Betanzos (A Coruña)

Dúas persoas resultaron feridas á primeira hora deste luns nun accidente de tráfico rexistrado no municipio coruñés de Betanzos.

Segundo a información da Central de Atención a Emerxencias 112-Galicia, o suceso ocorreu sobre as 8,30 horas no lugar da Infesta, en Requián, onde chocaron frontalmente dous turismos.

Ata o punto desprazáronse os Bombeiros de Betanzos e a Garda Civil de Tráfico, así como efectivos de Protección Civil e persoal sanitario do 061 para prestar asistencia aos feridos.

COLISIÓN EN OLEIROS

Á mesma hora, o 112-Galicia rexistraba un aviso por unha colisión entre dous turismos no municipio coruñés de Oleiros. Foron os efectivos de Protección Civil os que informaron o choque, ocorrido na Avenida de Rosalía de Castro, á altura do número 114.

Desde o 112 requiriuse a intervención dunha ambulancia do 061 para asistir a unha persoa que se sentía indisposta. Así mesmo, solicitouse a colaboración da Policía Local e informouse aos Bombeiros de Arteixo.

Debido ao impacto, un dos coches chocou contra un muro e moveu unha tubaxe de gas. Aínda que os efectivos de emerxencias confirmaron que non houbo escape, o 112 puxo os feitos en coñecemento do persoal da empresa subministradora.