Caramuxo Teatro leva este domingo á Fundación SGAE en Santiago o seu espectáculo 'Feo'

A Sede de Fundación SGAE en Santiago de Compostela acolle este domingo unha nova función de 'Escena en Familia', o ciclo de artes escénicas para os máis pequenos, que nesta ocasión ofrece 'Feo', unha proposta de Caramuxo Teatro.

Segundo informa a Fundación SGAE, trátase dun espectáculo recomendado para nenos a partir de tres anos baseado no clásico 'O patito feo' de Hans Christian Andersen.

O pase deste domingo 19 de marzo terá lugar ás 12,30 horas. O prezo dos billetes é de cinco euros, que se reduce a catro euros con desconto.

Na súa trama, unha pequena fábrica de patitos de goma produce todos os días centos e centos de elementos do mesmo tamaño e cor, pero un día sae un patito diferente. 'Feo' é, segundo engade, "un canto á diversidade e á esencia dun mesmo; unha comedia para toda a familia".

O ciclo 'Escena en Familia', unha iniciativa da Fundación SGAE en Santiago de Compostela, leva en activo desde abril de 2008. As seguintes convocatorias da súa programación son 'Cincenta', de Danthea Teatro (días 25 e 26 de marzo); 'A Illa dos Nenos', de Hocus Pocus (1 e 2 de abril); e 'A cabeza do dragón', de Títeres Cachirulo (8 e 9 de abril).