Escotet: "Ás veces temos a sensación de que nos queren converter no policía verde"
Pide "eficientar" a regulación bancaria e axustar o impulso da sustentabilidade.
Por Europa Press / Redacción | MADRID | 03/06/2025 | Actualizada ás 12:06
O presidente de Abanca, Juan Carlos Escotet, pediu ás autoridades europeas "eficientar" a regulación bancaria e axustar o impacto da sustentabilidade ante o novo escenario xeopolítico que se abre. O presidente da entidade, que tamén é o seu principal accionista con preto dun 85% do banco, explicou durante un acto organizado por IESE que entende que Europa queira asumir un "rol de liderado" na transformación enerxética, pero que "ten que adaptarse ao novo escenario xeopolítico".
"Creo que Europa debe de axustar ese ritmo e non frear a competitividade", expuxo Escotet, xa que a aplicación actual do marco de sustentabilidade pode "destruír vantaxes comparativas". "Ás veces temos a sensación de que nos queren converter no policía verde", criticou o presidente do banco galego, propondo que o rol da banca debe ser de "catalizador".
Doutra banda, Escotet asegurou que Europa ten un "problema de hiperregulación" e que o sector bancario afronta "custos innecesarios" que afectan á eficiencia e capitalización. Como mostra disto, explicou que para Abanca, os custos de emisión de instrumentos para cumprir cos requisitos os requisitos mínimos de fondos propios e pasivos elegibles (MREL, polas súas siglas en inglés) son duns 200 millóns de euros.
"A regulación no momento que apareceu era necesaria, pero a realidade bancaria é totalmente diferente. É o momento de exporse alternativas distintas. Habería que buscar formas de eficientar esa regulación", afirmou.
