O prazo para presentar traballos ao 'XIV Premio Pura e Dora Vázquez' de ilustración pecha o venres 31 de marzo

O venres 31 de marzo finaliza o prazo de presentación de traballos para o XIV Premio 'Pura e Dora Vázquez' na modalidade de ilustración, dotado con 1.500 euros, que convoca a Deputación de Ourense.

O obxectivo do certame é recoñecer a calidade artística de traballos creados para nenos e mozos, fomentar a lectura entre este público e destacar a figura das escritoras Pura e Dora Vázquez.

Os participantes deberán presentar os traballos tomando como base o texto gañador na modalidade de narración, que foi a obra 'Do meu nome e outras trapalladas', do escritor Antonio Yáñez Casal.

Os interesados en participar na modalidade de ilustración poderán solicitar o texto por tres canles diferentes: en persoa, por correo electrónico ('publicacions@depourense.es) ou a través do teléfono 988.317.790.