Piden 3 anos de prisión para unha ex-deputada

O 5 de xullo haberá un xuízo en Ourense pola reforma do pub Seven. Os antigos donos acusan a María José Caldelas de falsificar a súa sinatura. Por iso pídenlle tres anos de cadea por dous presuntos delitos de falsificación documental.

Segundo informa Economía Digital citando a edición local da Voz, Caldelas está acusada de falsificar as firmas dos antigos propietarios para pedir as licencias de obras ao Concello coas que reformar o local e acondicionalo para o ocio nocturno.

O Seven era unha cafetería pero estivo funcionando como local de noite até que o Municipio descubriu o suposto mal uso do local. Era frecuente que este pub da Praza das Mercedes acollera as celebracións das constantes vitorias electorais do PP.

Esta non é o único conflito de permisos no que está involucrada a ex-parlamentaria. Outro local da súa copropiedade, a cafetería La Central, está no punto de mira do Concello dende hai anos. 

Esta situado nunha concesión pública no Xardín Xaponés e foi cedido a unha empresa na que participa a ex-deputada, malia que a Lei prohibe expresamente a cesión sen permiso deste tipo de concesión. Malia a súa céntrica ubicación, paga un canon irrisorio, que non se renova dende metade do século XX, 1968. Un informe da Policía Local indicou recentemente que o negocio funciona vulnerando varias normativas.