Un consorcio de empresas europeas e a UVigo desenvolve un sistema para mellorar a eficiencia enerxética en edificios

Un consorcio público-privado de España, Francia e Holanda traballa nun proxecto que, con tres millóns de euros de orzamento e dous anos de duración, ten como fin desenvolver, implementar e optimizar solucións para mellorar a eficiencia enerxética dos edificios e reducir "drasticamente" as emisións de CO2 e o consumo de enerxía dos edificios.

Trátase do proxecto 'Enginency', que coordina a compañía española ICM División Industrial, e no que participan tamén a empresa francesa Qivivo e a holandesa DEMO Consultants BV, así como a Universidade de Vigo (UVigo), a través dos grupos de traballo de Tecnoloxía Enerxética e de Xeotecnoloxías Aplicadas.

Este proxecto permitirá realizar simulacións sobre modelos calibrados automaticamente e desenvolver unha ferramenta holística para inspeccionar edificios e medir a súa eficiencia enerxética, tras o que fará predicións e estimacións. Con iso, reducirase en máis do 50 por cento o consumo enerxético do usuario final; nun 94% os custos de inspección e nun 88% a súa duración.

Para iso, desenvolvéronse distintos sistemas -como un dron e unha mochila con sensores e cámaras integradas-, que permiten capturar a realidade dos edificios para identificar posibles fugas enerxéticas e así xerar modelos e facer unha estimación do investimento que faría falta para liquidar posibles problemas.

Así, espérase que 'Enginency', que chegará ao mercado como un 'SaaS' (Software as a Service), accesible para calquera usuario a través de Internet, xere 65 novos postos de traballo dentro do consorcio e un ingreso acumulado superior aos 20 millóns de euros durante o cinco primeiros anos de comercialización.