Por E.P. | LUGO | 13/06/2017 | Actualizada ás 11:24
A Autovía do Cantábrico, a A-8 leva xa dous días cortada á altura de Mondoñedo (Lugo) por mor da néboa. Unha situación que impide a correcta conexión de Galicia co Cantábrico a través de autovía.
Neste punto, situado entre Mondoñedo e Abadín, son frecuentes os cortes debido á escasa visibilidade que permite a néboa. Para salvar esta circunstancia, o tráfico diríxese cara á estrada N-634, aínda que a DXT tamén advirte que a visibilidade é "reducida" nesta vía por mor da néboa.
E é que os vehículos vense obrigados a coller a antiga estrada entre os puntos quilométricos 536 e 552, segundo informou a DXT. Unha situación que non é nova e que leva anos sen resolverse. De feito, e tras varios accidentes mortais, instaláronse varios dispositivos lumínicos e controis de velocidade que, con todo, non son suficientes.
Cando hai moita nubosidade, faise case imposible circular por ese tramo da autovía, polo que a DXT optou por cortar a circulación para evitar accidentes. Polo momento, as distintas opcións para evitar esta situación non teñen fructificado, entre elas, a construción dunha zona cuberta onde é máis persistente a néboa.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.