O Teatro Colón da Coruña acollerá en setembro a estrea de 'Un ballo in maschera' de Verdi

O Teatro Colón da Coruña acollerá os días 1 e 3 de setembro a representación da obra de Guiseppe Verdi 'Un ballo in maschera', producida pola asociación coruñesa Amigos da Ópera coa Orquestra Sinfónica de Galicia.

O título escollido para esta nova produción, non representada en Galicia durante os últimos 20 anos, responde a unha homenaxe que o colectivo operístico coruñés quere renderlle á soprano ourensá Ángeles Gulín no décimo quinto aniversario da súa morte.

Para a posta en escena, segundo informa a Consellería de Cultura, Amigos da Ópera conta coa Orquestra Sinfónica de Galicia e o Coro Gaos. Os papeis solistas serán interpretados polo tenor Gregory Kunde, a soprano Ángela Meade, o barítono Juan Jesús Rodríguez, a mezzo Marianne Corneti e tamén a soprano María Monzó.

A montaxe de 'Un ballo in maschera' foi presentado este xoves polo director de Agadic, Jacobo Sutil, nun acto no que tamén participaron o alcalde dá Coruña, Xulio Ferreiro, a vicepresidenta da Deputación Provincial, Goretti Sanmartín e a presidenta da Asociación Amigos da Ópera, Natalia Lamas.

Desta forma, con esta obra a Programación Lírica de Amigos da Ópera regresa ao Teatro Colón. Sanmartín, segundo informa o organismo provincial, trasladou o seu agrado pola "reinauguración" con este programa lírico do espazo cultural con xestión directa da Deputación.