Descobren en Adro Vello mostras de peixe de hai 1.700 anos e restos de 7 persoas
Entre os corpos, inhumados entre os séculos V e XVII, hai un esqueleto dun recén nado.
Por E.P. | SANTIAGO DE COMPOSTELA | 30/06/2017 | Actualizada ás 18:05
Investigadores das universidades de Vigo e Santiago realizaron no xacemento da factoría romana de salgadura de Adro Vello (no municipio pontevedrés do Grove) un achado sorprendente: mostras de peixe de 1.700 anos de antigüidade, e restos de 7 persoas, tres delas menores dun ano e un bebé recentemente nado.
O director técnico do estudo, o investigador Adolfo Fernández, do Grupo de Estudos en Arqueoloxía, Antigüidade e Territorio (GEAAT) da Universidade de Vigo, presentou este venres os resultados da intervención, realizada ao amparo do proxecto de I+D Marie Curie Talent do Campus do Mar, financiado con fondos europeos.
Segundo explicou, o obxectivo do equipo era rexistrar a factoría romana de salgadura mellor conservada de Galicia, e que foi abandonada sobre o ano 300 d.C. Para iso, os investigadores tiveron que limpar o xacemento, cuberto de maleza, e baleirar os recheos realizados tras a última escavación, que tivo lugar hai xa 27 anos.
RESTOS HUMANOS
A primeira sorpresa chegou ao empezar a escavación posto que, aínda que se prevía a aparición de tumbas, os arqueólogos lograron identificar os esqueletos de polo menos 7 persoas, inhumadas en diferentes períodos, entre o século V ou VI ata o XVII.
A antropóloga Olalla López, da USC, explicou que a importancia do achado reside en que "a conservación é moi boa", non había construcións encima, "cobre moitísimo tempo", e "queda moito por escavar". "É unha necrópole moi importante e dános a posibilidade de coñecer como era a xente que vivía alí, que dieta tiña, que enfermidades, etc.", subliñou.
Así, nesta intervención identificáronse 7 esqueletos: un deles pertence a un bebé recén nado, outros dous son de nenos de menos dun ano de idade, un cuarto pertence a outro neno duns 10 anos, e os tres restantes son de adultos.
PEIXE DE HAI 1.700 ANOS
Por baixo do nivel da necrópole, os arqueólogos escavaron un dos pilos da factoría romana de salgadura, e conseguiron extraer numerosas mostras de peixe (peixes pequenos triturados, restos de espiñas, escamas, etc.), o que constitúe un achado de gran valor, posto que non existen precedentes destas características.
"Isto permitirá coñecer a industria da salgadura, o tipo de pesca que se practicaba, a propia evolución dos peixes", subliñou Adolfo Fernández, quen confirmou que o seu equipo recibiu xa varias peticións doutros investigadores para analizar esas mostras.
Restos de malacofauna, en especial ostras, e doutros moluscos asociados ao consumo, completan os achados localizados nos píos, cuxos morteiros tamén serán estudiados. Nas análises dos achados participarán investigadores da Escola de Enxeñaría de Minas e da Enerxía.
En definitiva, segundo recoñeceron os responsables científicos, a intervención arqueolóxica en Adro Vello supuxo unha caixa de "sorpresas" xa que, o que empezou como o rexistro dunha fábrica romana de salgadura, acabou coa aparición de restos de peixe de 1.700 anos de antigüidade e a confirmación da existencia dunha importante necrópole. "Este material vai dar resultados de investigación durante moitos anos", recalcou Olalla López.
