Aparece a muller desparecida dende o luns

Foi unha veciña quen viu á muller sobre as 21.30 horas na zona de Vilariño, na parroquia de Aldán, en Cangas, e avisou á Garda Civil. Patricia D.R. atopábase en bo estado, pero presentaba signos de desorientación, polo que foi trasladada a un centro médico.

A voz de alarma saltou cando esta veciña de Moaña, de 42 anos, non se presentou no seu posto de traballo o pasado luns. Pouco despois foi localizado o seu bolso e varias pertenzas na praia moañesa de Videira-Tirán, e despregouse un dispositivo de procura por terra e por mar, con apoio dun helicóptero.

Varias testemuñas aseguraron ver a Patricia na tarde noite do martes no paseo de Rodeira, en Cangas. Finalmente, foi localizada en Aldán por unha veciña, que a identificou e subiuna ao seu coche.